Khur jingjop ka Mylliem Lum bad ka Jongksha ha ka SSA 2nd Division 2024
Khyrwit hat trick u Arbunsing Warjri
SHILLONG, Nailur 30: Ka Mylliem Lum ryngkat bad ka Jongksha SC ki la long ki kynhun ba seisoh ha ki jingïalehkai ka lympung Second Division 2024 jong ka Shillong Sports Association ba la long ha ka Lah Sngi U Blei (30.09.2024) ha SSA Ground, Polo.
Lah ban kdew ba baroh ar tylli ki jingïalehkai ki long kiba itynnat bad kiba shongkun, ha kaba la sakhi haduh 15 tylli ki kol ba la pynkhih hapdeng kine ki kynhun ïalehkai na ka Group-B.
Ka Mylliem Lum ka la pynliem da 5 – 2 kol ïa ka Laitlyngkot SC, katba ka Jongksha SC ka la jop da 6-2 kol ïa ka PFR FA, ban khur pura ïa ki lai point.
Ha ka jingïakhun kaba nyngkong, la sakhi ïa ka Mylliem Lum kaba jop 5 – 2 kol ïa ka Laitlyngkot SC, ha kaba u Arbunsing Warjri jong ka Mylliem Lum u la ai mynsiem ïa ka kynhun ban khur ïa ka jingjop da kaba khyrwit hat trick (26, 34 bad ha ka 88 minit), nangta kiwei pat ki kol ki la wan lyngba u Eliastar Nongsiej (50 min) bad na u Lesterwel Khyriem (89 min).
Na ka liang jong ka Laitlyngkot ka la ïoh ban pynphai ar kol, bad kine ki kol la thep da u Restorwell Marbaniang ha ka 32 minit bad na u Melambha Shabong ha ka minit kaba 70.
Ha ka jingïakhun kaba bud, ha kaba ka Jongksha SC ka la jop da 6-2 kol ïa ka PFR FA, la sakhi ïa ar ngut ki player ka Jongksha, ba kynthup ïa u Iohbor Nonglyer (25 & 54 minit) bad u Donbok Lyngdoh (39 & 49 minit) kiba la ïoh ban thep mar 2 kol, katba u Robert Khongjoh (63 min) bad u Basuklang Bina (85 min) ki la ïoh ban thep mar kawei.
Na ka PFR FA, ki ar kol la thep da u Franky Shabong (45+2min) bad u Malvernly Lyngkhoi (68min).
Ka jingïakhun ha kane ka Sngi Hat Majai (01.10.2024), kan long ha ka por 2:45 baje mynsngi, ha SSA Ground, Polo hapdeng ka Sohiong SC pyrshah ïa ka Laitkyrhong SC.