SHILLONG, Nailur 04: Ka Laitkyrhong SC bad ka Marbisu SC ki la ïoh ban khur pura ïa ki lai point hadien ba jop ïa ki jingïakhun ha ka Sngi Balang (04 tarik, Nailur 2024) ha ka lympung phutbol kyrdan Second Division 2024 jong ka Shillong Sports Association ha SSA Ground, Polo.
Ha ka jingïalehkai kaba nyngkong la sakhi ïa ka Laitkyrhong SC kaba la pynjemkhnap ïa ka Imson SC da 4-1 kol ban khur ïa ka jingjop. U Shngainlang Surong u la ïoh ban pynkhih ar kol (8 bad 90 minit), u Learningstar Warlarpih (19min) bad u Banshaibok Khongsngi (78min) ki la ïoh ban thep mar kawei.
Na bynta ka Imson SC ka shi kol la thep da u Anju L Marshillong ha ka 22 minit.
Ha ka jingïakhun kaba ar, ka Marbisu SC ka la jop salit da 1 kol ïa ka Laitlyngkot SC bad kane ka namtam la thep da u Damanbha Mylliemngap ha ka 57 minit.
Ka jingïakhun mynta ka Sngi Palei (05.09.2024) kan long hapdeng ka Umlyngka SC pyrshah ïa ka Lumparing SC, ha ka por 12:30 baje mynsngi, nangta bud sa ka jingïakhun kaba ar ha ka por 3:30 baje nohphai sngi hapdeng ka Mawkriah West SC pyrshah ïa ka Lawmali SC. Ki jingïalehkai kin long ha madan SSA Stadium, Polo.
