Khring ki mar ba phylla na ki 7 tylli ki Ri ha ka International Shillong Trade Fair

Shillong, Lber 29: Ki tiar ba kham phylla ba ki 7 tylli ki Ri ki wanrah ha ka International Shillong Trade Fair ka la khring bun bha ki paidbah ka jylla kiba ju sngewtynnad ban leit sha kitei ki iew bar-ri kiba ju long man ka snem ha madan Iewrynghep, Laitumkhrah.
Mynta ka kynti ki ri kiba wan shim bynta ki kynthup ïa ka ri Turkey, Afghanistan, Iran, Thailand, Lebanon, Ghana bad Egypt. Nalorkata, ki don ruh daki phew tylli ki jylla na ka ri India kiba pynphuh lang ïa katei ka iew barri.
Haba phai sha ka Turkey, kane ka ri ka la wallam ïa ki jingbam kiba shngiam bha kiba ki khot ki Baklava. Kiba bun ki paidbah ki la pynlut bha ïa ka por ban thied ïa ki jingbam kiba la shna bad pynwandur bun rukom ha la ki jong ki jong ki jingmad.
Nangta na Egypt pat ki wanrah ïa ki tiar kiba long katkum ka kolshor jong ki khamtam ki tiar ba pynwandur kum ki Pyramid bad kiwei kiwei. Ki don ruh ki tiar kiba long kum ki kynja jingbuh syntiew bad ki jingbuh itynnad.
Ki mar ba ka ri Lebanon kumjuh ka Iran ki wallam ki kynthup ïa ki jingdeng bad ki kpieng kiba la shna pynwandur bha nalor kiwei kiwei ki mar.
Ka Ghana ruh kumba long ka Egypt ka wanrah da ki mar kiba dei katkum ka riti dustur jong ki. Kaba khring eh ïa ki paidbah kadei ki stieh ïada khmat kaba ki riew hyndai ha katei ka ri ki ju phong haba ki leit sha ka thma.
Napdeng kine ki ri, kiba bun ki paidbah ki ïa tur ban leit mad bad leit thied ïa ki jingbam kiba wanrah na ka ri Afghanistan. Kane ka Ri ka la wanrah da ki jingbam thiang ba harukom khamtam ki soh ba la thad tyrkhong.
Ha kajuh ka por pat, ki mar kiba ka Thailand pat ka wanrah kiba bun ki dei ki tiar kiba ïadei bad ki samla bad ki longkmie kumjuh na bynta ki heprit.
Kane ka iew ïadie ïathied kaba la sdang naduh ka 5 tarik mynta u bnai kan sa kut noh ha ka 26 tarik mynta u bnai.
Na ka lïang u Vice President ka International Shillong Trade Fair, u Rajesh Das kumjuh u General Secretary ka Shillong Trade Fair u Mit Das ki la ïathuh ba ka jingwan jong ki paidbah sha kane ka iew bar ri ka la long kaba shongshit bha naduh kaba sdang.
Ha kajuh pat ka por ki kyntu ïaki paidbah ba kin shim kabu da da kaba wan ban peit bad sakhi hi markhmat ïa kine ki iew barri kiba la wallam khnang haduh nongbah Shillong.