Shillong, Nohprah, 11: Ka Bharatiya Janata Party (BJP) Meghalaya State Unit ha ka sngi Balang ka la khot thep kyrteng ïa kino kino kiba angnud ban aireng ha ka elekshon MDC sha ka Ingdorbar Thawaiñ jong ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC) ban sa long shen.
Ha u kyrwoh ba la phah sha ki lad pathai khubor da u Convenor ka State Media Cell, BJP, Meghalaya Pradesh u Sabyasachi Ghose, ka BJP ka la pyntip ba ka sngi bakhatduh ban pdiang ïa ki kyrteng ha ki District Committee kan long ha ka 30 Nohprah bad ïa baroh ki kyrteng ba la ibit da ka District Committee dei ban pynpoi sha ka State Election Committee (SEC) jong ka party shwa ka 5 tarik, Kyllalyngkot, 2025.
Ki mat kiba ka BJP ka tyrwa sha ki paidbah ha ka elekshon MDC ka long ban pynsted ïa ka jingpynbit pynbiang ban pynkylla ïa ka Khyrnit Bahynriew katkum ki jingdonkam jong ka por kaba la shu sahteng kumto ha Iingdorbar Thawaiñ jong ka ri lane ka jingpynbeit thymmai ïa ka Khyrnit Bahynriew jong ka Riti Synshar ka ri India.
Lad ka BJP ka jop kham bun ki seat ka thmu ban pynkupbor ïa ki Dorbar Shnong bad Dorbar Raid lyngba ka bhah kyrpang lyngba ka Direct Funding bad khamtam eh ban wanrah ïa ka rukom synshar shnong kaba ryntih ha baroh ka rilum Khasi bad Jaiñtia bad ban ïada ïa ki trai ri trai muluk bad ban pynkhlaiñ shuh shuh ïa ka rukom treikam ki Autonomous Distirct Council (ADC) ban pynneh pynsah ïa ki tyllong um, ki khlaw ki btap bad ban pynskhem shuh shuh ïa ka khuid ka suba da kaba wad ki lad ki lynti ban wanrah ïa ki projek bapher bapher sha ki Autonomous Distirct Council (ADC).
