Nongstoiñ, Jymmang 06: Ka Deputy Commissioner & Principal Census Officer, Eastern West Khasi Hills District Mairang, ka la pyntip sha baroh ki Rangbah Shnong bad ki paidbah nongshong shnong jong ka Eastern West Khasi Hills District, ba ka jinglum jingtip na ka bynta ka Census 2027 kan sdang noh shen na ka bynta ka thup kaba nyngkong lane ka first phase yn don ar bynta.
Kawei kan long ka Self Enumeration (SE) ka jingpyntip hi dalade lyngba ka online portal ka ban sdang naduh ka 1 tarik Jymmang 2026 haduh ka 15 tarik Jymmang 2026, kane kan ailad ïa ki longïing ban pyndap hi ïa ki jingkylli kiba ïadei bad ka census 2027 da kaba leit sha ka website SE.Census.gov. Hadien ba la pyndep ïa ka jingpynrung kyrteng lyngba ka Self Enumeration, kin sa ïoh ïa u SE-ID Number.
Kawei pat ka jingpynrung kyrteng kan long kyngba ki nonglum jingtip (enumerator) ba la thung da ka ophis jong u Principal Census Officer, Eastern West Khasi Hills District ki ban sa leit rung sha baroh ki longïing ha ki shnong. Ïa kane yn sdang naduh ka 16 tarik Jymmang 2026 haduh ka 14 tarik Jylliew 2026, na ka bynta ban ïarap ïa kito ki bym shym la lah ban leh hi da ka Self-Enumeration bad ruh ban wan pan ïa u SE-ID Number na kito kiba la pyndep hi lyngba ka online portal.
Ka Deputy Commissioner & Principal Census Officer Eastern West Khasi Hills District Mairang, ka la pyntip ba ka Census ka dei ka kam kaba kongsan eh na ka bynta ka ri, namar ïa ki jingtip ba la ïoh lum yn pyndonkam na ka bynta ki program pynroi bad ki skhim jingïarap paidbah bapher bapher.
La kyrpad ïa ki paidbah nongshong shnong ban pdiang bad ai ka jingïatreilang bad ki nonglum jingtip, ban ai ïa ki jingtip kiba dei bad ba shisha, khnang ba ka jinglum thup na ka bynta kane ka Census 2027 kan long ka ba tikna bad kaba ïaid beit.
La kyrpad ruh ïa ki rangbah shnong ban phah jingtip sha baroh ki longïing ha ki shnong, khnang ba kin tip bad pynkhreh na ka bynta ka jingpynrung kyrteng ïa ka ïing ka sem ha kane ka Census 2027.
