Khot ka Academy ba pawnam na Europe ïa ka kynhun phutbol na Meghalaya ban wan kilan met

Shillong, Ïaiong 08 : Ka Academy ba pawnam tam ha dewbah Europe ka Olympique Lyonnais Academy ka la khot sngewbha ïa ka kynhun ïalehkai phutbol Under -18 jong ka Meghalaya ban wan kilan met sha France na ka bynta 20 sngi ha u Jylliew mynta u snem.
Ïa kane la ïathuh da u Myntri Rangbah ka jylla, Conrad K Sangma ha ka jingïalang pynkup burom ïa ka kynhun ïalehkai U-17 jong ka Myngken Christian Higher Secondary School, Ri Bhoi District hadien ba ka la wan ha ka kyrdan kaba lai ha ka Indo-French Football Tournament 2025, kaba long naduh ka 25tarik haduh ka 29tarik u Lber ha Paris, France.
“Kane ka jingshah khot ban leit kilan met kan ïarap shuh shuh ïa ki rangïalehkai jongngi,” ong u Myntri Rangbah da kaba pyntip ruh ba kane ka lympung kilan met kan sdang naduh ka 05tarik u Jylliew.
La ïathuh ruh ba da ka jingshah khot ha ka Olympique Lyonnais, na ka liang ki rangïalehkai ka jylla kin ïoh ban rung bad kilan met ha ki madan ba kynsai jong katei ka Academy, nangta ruh ban ïoh ïalehkai paralok bad ki klob na katei ka thain.
“Kane ka lympung ka long ruh palat ïa ka phutbol naba ka wanrah ïa ka jingïatylli, ka jingïabujli ïa ka kolshor bad ka pynkhlain shuh shuh ïa ka jingïadei hapdeng ka India bad France,” u la ong.
Nangta u ong ruh ba ka jingïoh lad ban ïalehkai sha barri kan ïarap ïa ki rangïalehkai ba kin ïoh shuh shuh ïa ka jingtbit, ki buit ïalehkai bad bun kiei kiei kiba ki nongïalehkai phutbol ki donkam bha ban ïoh.
Ka jingïoh jong ka skul Myngken ban leit ïakhun sha France kadei hadien ba ka la wan ba ar ha ka Subroto Cup 2024. Ha kane ka jingleit ïakhun, ka Meghalaya ka la ïoh ruh ban aireng pyrshah ïa ki kloob ba pawnam na katei ka ri kynthup ïa ka FC Versailles, Sarcelles FC, bad ka Grigny FC.
Ha kane ka jingpynkup burom kaba long ha Main Conference Hall, Main Secretariat la donlang ruh naduh u Director ka tnad Sports & Youth Affairs u DD Shira, nangta u President ka Meghalaya Football Association Bah Hamlet Dohling bad kiwei kiwei.
Na ka liang u Myntri Rangbah u la ïai ban ba ka jingjop jong ki ha kane ka lympung ka la rah ïa ka burom ym tang ïa ka skul hynrei ruh ïa ka jylla bad ïa ka ri hi baroh kawei.
Ïa ka kynhun ka kynthup ïa ki samla pule naduh klas IX – X jong ka Myngken Christian HS la pynkup burom lang ryngkat u Coach ka kynhun u Bah Bobby Nongbet ba dei ruh u DSO ka Ri Bhoi ryngkat u Assistant Coach Bah Kitborlang Kharlukhi bad ruh u Team Manager Bah Carmelius Ramshon.
Ki rangïalehkai ki kynthup ïa u Wanpli Malang (Captain), Mebankhraw Nongrum. Precious Stone Nongsiej, Mebatskhem Shylla, Bipiush G Marak, Pynshailang L Nonglait, Saindur Rynjah, Banpliebok Khongjoh, Richborn Kharpuri, Erickson Pamsad, Banganson Nongphlang, Samepaia Thangkhiew, Andrewson Marbaniang, Franky Dkhar, Alicestar Thangkhiew, bad u Mebanlamlynti Masharing.