Khot ïakren ka Sorkar ïa ka Mazdoor Union, rai ban bteng biang ka jingwanrah Petrol sha Meghalaya

Nongpoh, Nohprah 14: Ka tnat Food Civil Supplies and Consumer Affairs ka Sorkar Jylla ha ka sngi Palei ka la khot ïa kren ïa ki nogïalam jong ka North East Petroleu m Mazdoor Union (NEPMU) ban ïakren sani hadien ba kane ka kynhun ki nongñiah trok kit um phniang ki la byrngem ban sangeh ka jingwankit ïa ka Petrol bad Diesel sha Meghalaya naduh ka 12 tarik mynta u bnai.
Ka NEPMU ka la shim ïa ka rai ban sangeh wan kit ïa umphniang Petrol bad Diesel hadien ba ki dkhot kiba la shah kem halor ka jingkynnoh ba ki donkti ban die tuh shiteng lynti ïa ka umphñiang kim pat lait satia na ka along ki Pulit haduh mynta mynne.
Da kane ka jingïakren kaba la long ha ka sngi Palei ha Nongpoh, Ribhoi District, ka NEPMU ka la rai ban wankit biang ïa ka umphniang sha Meghalaya.
Ïa kane ka jingïakynduh, la lamkhmat da u Additional Deputy Commissioner jong ka East Khasi Hills u Bah P.T Passah bad u Additional Deputy Commissioner ka Ri Bhoi u Bah M.B tongper katba na ka liang jong ka Mazdoor Union la ïalam da u General Secretary u Ramen Das bad na ka liang ka Petroleum Dealer Association of Meghalaya pat la ïalam da u Bah Kennedy C. Khyriem.
Ha ka jingïa kren bad ki lad pathai khubor hadien ba la wai ka jingïakynduh, u Additional Deputy Commissioner ka East Khasi Hills u Bah PT Passah, u la ïathuh ba kane ka jingïakynduh bad ka Mazdoor Union ka la long kaba seisoh hadien ba ka Union ka la rai ban sangeh noh ïa ka jingïakhih da kaba byrngem ban sangeh wan kit ïa ka umphniang sha Meghalaya.
U la ong ruh kane ka jingshim rai jong ka Mazdoor Union ban weng noh ïa ka jingïakhih ban sangeh wanrah umphniang sha Meghalaya, ka dei ruh hadien ba la pynpaw ïa ka jingeh ki paidbah bad ba la pynsngewthuh shai ba lada ki sangeh ban wan kit ïa ka umphniang kane ka wanrah ka jingeh kaba khraw ïa ki paidbah ka jylla Meghalaya.
U la pynshai ruh da kaba ong, kumba ka Mazdoor Union ka la dawa na ka Sorkar Jylla ban pyllait along noh ïa ki dkhot ka Union kiba la shah kem halor ka jingkynnoh ba ki la die tuh ïa ka Umphniang ha shiteng lynti kumba la ïoh kem dang shen ha ka jingkhynra da ki Pulit ka Meghalaya bad kane ka jingdawa ka long kaba ym lah ban leh eiei da ka Sorkar namar ïa kane ka kam la shaniah ha ka ïingbishar badon burom ba kan ai ïa ka jingbishar kaba hok ba lada kita ki dkhot jongki kim don bynta kin sa lait hi na ka jingpynshitom kiba dei katkum ka aiñ.