Shillong, Nohprah 14 : Ka Mylliem constituency ka la ïoh haduh palat 7.5 klur tyngka na ka bynta ban pynbha ïa ki surok naduh 12 Mer sha Mylliem Mawkhar bad ruh na Sanmer sha Umlyngka -Kynton.
Haba ïathuh ïa kane, u Chief Adviser ka sorkar jylla, Bah Hamlet Dohling ba dei ruh u MLA barim ka Mylliem u la ong ba ki la ïoh ïa ka mang tyngka kaba 4.21 klur tyngka ka na bynta ban shna ïa ka surok na Sanmer kaban mih ter ter sha Mawklot – Nongumlong haduh Umlyngka – Kynton.
U la ong ruh ba ki la ïoh pat ïa ka mang pisa kaba 3.34 klur tyngka ban shna ïa ka surok naduh 12 Mer ter ter sha Mylliem Mawkhar – Maweitnai.
“Ka kam mynta ka la ïaid shakhmat ban pynbha ïa kine ki surok ha ka constituency,” u la ong.
U Bah Hamlet u la pynpaw ruh ba kum u briew uba thrang ban shakri um shym la shongthait ban trei na ka bynta ban peit ba ka constituency bad ki nongshong shnong kin ïoh pura ki jingmyntoi na ka sorkar jylla.
