Khñiot ka MECL ïa ki paitbah hap thang mombati haba treikam da ki Computer
![](https://mawphor.com/wp-content/uploads/2022/02/meECL.jpg)
Nongstoiñ, Nailur, 13: Ka jingkhñiot ka Meghalaya Energy Corporation Limited ïa ki paitbah nongpyndonkam bording, ka la pynbitar haduh katta katta namar baroh shi snem ym ju don ka por ba kin ïoh ban pyndonkam pura ïa ka bording namar ha ka shi sngi ka jingpynlip bording ka dang ïai bteng haduh mynta. Nalorkata na ki arphew saw kynta ka jingïoh pyndonkam bording ka long tang kumba phra haduh shiphew kynta.
Halor ka jingpynlip bording, ki paitbah nongshong shnong ha West Khasi Hills ki la ong ba ha ki bnai tlang naduh Kyllalyngkot haduh Jylliew, ki la ngeit ïa ka jingong jong ka MECL ba ka jingpynlip bording, ka dei namar ka jingrit palat ka um ha Damsite.
Hynrei, ha u bnai Nailar ba la dep pat ka la pynbna ba yn pyllait noh ïa ka damsite ha kano kano ka por namar ka um ka la palat ïa u lain ba ka dei ban poi. Ki la ong ba ka MECL ka la shu ïaleh khun ja kai bad ki paitbah haduh ba kiba treikam da ki kor computer, ki hap ban thang da ki mombati tang ban lah pyndep ïa ki kam ba kyrkieh.
Ki la ong ruh ba ka jingbym kheiñ snep jong ka MECL ïa ki paitbah, ka dei namar ba ha ki ophis sorkar la dep pynbiang ïa ki generator ki ba heh kat kawei ka trok ryngkat ki inverter lane ki kor pynneh bording. Nangta ki ba riewspah ruh ki la pyndonkam da ki solar panel kiba shong dor da kiba saw lak haduh shiphew lak tyngka, kiba lada ym don bording da ki bnai ruh kim lei lei shuh.
Hynrei ki riew paitbah kum ki dukan type kot, Xerox mashin bad ki khynnah pule kiba pyndonkam da ki computer na ka bynta ban pule online ïa kiba bun ki bynta, ki hap ban shu tang da ki mombati tang ban ïohi ïa ki dak ha ka board jong ka computer.
Ki la dawa ruh na ka sorkar ba ka dei ban pyntreikam ïa ki kyndon aiñ kaba la tip kum ka Consumer Protection Act lane ka hok ki nongpyndonkam bording, namar kumba long mynta ka ophis jong ka MECL ka pyndonkam bha ïa ka aiñ khongpong, kata lada ki nongpyndonkam bording kim lah ban siew ïa ka bai thang bording kumba ar ne lai bnai, ki la shah ot beit. Don teng teng ba ha shuwa ba kin leit ot ruh kim ju pyntip ïa ki trai ïing hynrei ki shu leit kiew beit ot beit ïa ki waïar rah sha ophis.
Nalor kata ka jingkiew ka bai bording ka la long kaba palat liam. Ki paitbah ki la ong ruh ba lada ka long kumne kan poi ka por ba kin ym siew shuh ïa ka bai bording bad lada ki briew jong ka ophis ki wan ban ot da ka bor kan poi haduh u pud jong ka jingïaklumar ruh.