Dawa ïa u MLA ka Jowai Constituency ban shna pynbha ïa ka surok Intermediary Bye-Pass, Jowai

Jowai, Nailur 13: Ki nongialam jong ka Jaiñtia Students Movement (JSM), Western Region ba la lamkhmat da u u samla Chanskhem Suchiang, President JSM, WR ha ryngkat ka jingsynran u samla Jimmy Raul Kharmuti, Working President JSM, CB lem bad kiwei kiwei ki dkhot ka JSM, ha ka sngi Balang ki la leit ban buh da ka dorkhas ha u MLA ka Jowai Wailadmiki Shylla uba dei ruh u Chairman ka tnat MUDA, jong ka Sorkar Jylla Meghalaya lyngba ka Office treikam jong u Deputy Commissioner Jowai, West Jaiñtia Hills District.
Ka Jaiñtia Students Movement, WR hadien ka Spot Inspection bad ka jingïoh ïa ka jingujor na uba bun ba lang halor ka jingsniew shaba palat pud jong u surok Intermediary Jowai Bye-Pass naduh jingkieng Myntdu NH44 Riatmulaiñ haduh lad Nartiang (Kiang Nangbah College, Jowai) haka jingjrong kaba 3.27 Km, uba hap hapoh ka jingpeit ka South Division, Jowai.
Kum ban shu pyn kynmaw ba une u Intermediary Jowai Bye-Pass, u long uba donkam haduh katta katta naka bynta ban pynduna ïa ka jingdheng kali kaba jur hapoh Jowai, khamtam ha ka por leit bad wai skul jong ki khynnah skul bad ki nongtrei Sorkar bad ki nongleit nongwan namar ka Jowai ka dei ka Sor kaba baroh ki briew na kylleng ka Ri Jaiñtia ki shañiah ban pyndep ïa ki kam ki jam jong ki.
Na ka liang ka JSM ka ai ka jingïaroh ïa u MLA ka Jowai hlaor ka jingshimkhia jong u ban wanrah ki surok babha hapoh Sor Jowai bad kiwei kiwei kiwei de ki Shnong hapoh ka Jowai Constituency, ka seng ka ïohi ruh ba dang don shibun ki jingduna bad ka ngeit skhem lyngba ka jingtrei shitom jong u MLA, ka jingtrei pynbha noh ïa une u Surok Intermediary Jowai Bye-Pass, khnang ba ki kali ba ïaid sha Shillong ne kiwei kiwei ki jaka ki bym donkam ban ïaid na Sor Jowai, ki lah ban ïaid na une u Surok, kane kan ïarap ban pynduna ïa ka jingdheng kali kaba jur hapoh sor Jowai bad kan wanrah ïa ka suk ka ïaid ka ïeng jong uba bun ba lang baroh.