Shillong, Naiwieng 08: Ka kynhun napoh ka jylla kaba ïakhun ha ka lympung I-League, kata ka Shillong Lajong FC ka la pynpaw ïa ka jingapkhmihlynti ban khur shalade ïa ki lai point ha ka jingïakhun ka ban long hala ïing mynta ka sngi pyrshah ïa ka NEROCA FC ka ban sa long ha madan 1st Ground jong ka SSA, Polo ha ka por 2 baje nohphai sngi.
Haba ïakren sha ki lad pathai khubor hynne ka sngi lyngba ka Press Conference kaba la pynlong ha Conference Hall jong ka SSA, Polo, u Head Coach ka Shillong Lajong u la pynpaw ba ka kynhun ka la pynkhreh bha na bynta kane bad ruh ka long ka kabu kaba paka ïa ka kynhun ban kyntiew ïa ki lai point ha ka miej lyngba kane ka jingïalehkai ka ban long hala ïing mynta ka sngi.
“Ka jingïakhun ban ïoh khur ïa ka namjop kan nym long kaba suk, watla kane ka kynhun kaba ngin sa ïakhun (NEROCA FC) ka la mad namrem ha baroh ar sien ki jingïalehkai ba ladep, hynrei ka klob kan nym kheiñ sting ïa kane namar katei ka kynhun kan ïaleh katba lah ban khur ïa ka namjop kumba thrang lem ka Shillong Lajong” la ong u Bah Bobby Lyngdoh.
Shuh shuh, u la bynrap ruh ba ka kynhun ka la don katto katne ki jingbakla ha ka jingïakhun ba ladep hynrei mynta ka kynti ka kynhun kan pynthikna ban ïakhun tyngeh bad ban nym pynsepei ïa ki kabu.
Na ka liang jong u head Coach ka NEROCA FC, u Jacob MJ Joseph u la ong, “Ka por ka long kaba lyngkot ïa ka kynhun ban pynkhreh namar ka jingjia ha Manipur kaba la khanglad ïa ngi ban ïoh ïa ka por kaba pura ban pynkhreh bha ïalade, hynrei watla kata ruh ngi kyrmen ban wanrah ïa ka jingïalehkai kaba itynnat bad ruh ban khur ïa ka namjop”.
Kumban shu pynkynmaw, na ka liang jong ka Shillong Lajong ka la ïoh ban khur shi point na ka jingïakhun ba ladep ha Kolkatta pyrshah ïa ka Mohammedan SC, bad ka kyrmen ba mynta ka sngi kan ïoh khur pura ïa ki lai point ba nyngkong ha kane ka lympung I-League samoi 2023-24 na ka jingïakhun hala ïing pyrshah ïa ka NEROCA FC.
