Khot aplikeshon ïa ki samla pule na ka bynta ki AICTE Scholarship Scheme 2023 – 2024
Mawkyrwat, ‘Naiwieng 08: U Deputy Commissioner jong ka South West Khasi Hills District, Mawkyrwat u la pynbna paidbah ba ka ophis jong u Director ka Higher & Technical Education, Meghalaya, Shillong ka khot aplikeshon na ka bynta ki samla pule kiba dei ki nongshong shnong ba pura jong ka Meghalaya halor ki lai tylli ki jait Scholarship Scheme jong u snem 2023 – 2024.
Ki jait Scholarship Scheme kiba la pynbna paidbah ba ki samla pule ki lah ban aplai ki long: ka AICTE – Pragati Scholarship Scheme ïa kito ki samla kynthei kiba pule ha ka 1st year ne 2nd year ha ka Degree/Diploma course ha kano ma kano ka AICTE Institution kaba la ïoh jingmynjur ha kaba 2 ngut ki khynnah na kajuh ka ïing ki lah ban aplai.
Shuh shuh la pyntip ba ka don sa ka AICTE – Saksham Scholarship Scheme na ka bynta kito kiba don jingduna ha ki dkhot met kiba pule ha ka 1st year ne 2nd year Degree/Diploma Course ha kano ma kano ka AICTE institution kaba la ïoh jingmynjur bad tang kito kiba ka jingduna ha ki dkhot met kam duna ïa ka 40% ki lah ban aplai.
Halor kitei ki Scholarship Scheme la bthah ba haba ki samla pule ki aplai ki dei ban don ïa ki jingdonkam ban ai ryngkat ka Income Certificate kaba la ai da ki bor kiba la ithuh kiba ka jingïoh kam dei ban palat ïa ka T. 8.0 lak shisnem bad ïa ka scholarship yn pynthymmai na ka bynta u snem uba bud hadien ba ki la phah ïa ka renewal aplikeshon lyngba ka National Scholarship Portal bad ban phah ryngkat ka Promotion Certificate ba la ai da u khlieh duh jong kata ka jaka kaba ki pule. Ki khynnah ki bym shym la pass ne kiew klass kin duh ïa katei ka scholarship.
Nangta, ka don sa ka 3. AICTE – Swanath Scholarship Scheme (Degree & Diploma) ha kaba ki nong-aplai ki dei ban long ki khunswet lane iwei na ki kmie ki kpa ne baroh ar ngut ki kmie ki kpa ki khlad na ka Covid-19 lane ki khun jong ki Armed Forces bad Central Paramilitary Force kiba ïap ha ka jingïaleh bad kiba ka jingïoh kam dei ban palat ïa ka T. 8.0 lak ha u snem ba ki aplai ryngkat ka Income Certificate ba la ai da ki bor ba la ithuh. Ki nong aplai ki dei ban long kiba pule ha ki AICTE institution kiba la ïoh jingmynjur ha ka Degree/Diploma Course ha ka 1st/2nd/3rd/4th year bad ki nong-aplai kim dei ban long kiba la ïoh ïa kawei na ki Central Government, State Government AICTE Sponsored Scholarship.
Ki samla pule ki lah ban aplai da ka online lyngba ka URL: www.scholarships.gov.in bad ki aplikeshon form ba la print bad ba la dep pyndap ki lah ruh ban phah sha ka jaka kaba ki pule ryngkat bad ki kot ki sla kiba donkam bad yn pdiang tang ïa ki online aplikeshon bad yn ym pdiang ïa kito kiba leh offline.