Yn wan ïakhun phutbol paralok u Eugeneson, ki MLA & MDC ka UDP pyrshah ïaka Synjuk ki RS Nongpoh Area

Nongpoh, Naiwieng 08: Namar ka jingjyllei jong u drok haka thaiñ Nongpoh khamtam bun naki khun samla kila sdang ban kyrni ha utei u jait jingdih buaid, ka UDP Youth Wing, Ri-Bhoi District haka jingïatreilang bad ka UDP State Wing kan sa pynlong da ka jingïalehkai phutbol paralok hapdeng ki MLA bad MDC ka UDP pyrshah ïa ka Synjuk ki Rangbah Shnong Nongpoh Area haka 10 tarik mynta u bnai naduh ka por 1 baje noh phai sngi bad pynbud pat sa ka prokram ai jinghikai halor ka jingma u drok ha madan NSCA Pahamsyiem.
Haba kren sha ki lad pathai khubor mynta ka sngi ha Nongpoh u Bah Lastforius Marngar President ka UDP Youth Wing, Ri-Bhoi District haka jingdonlang u Bah Wanphrang Sumer Adviser u la ong ba ka party UDP kan pynlong ïa katei ka jingïalehkai phutbol paralok lem bad ka Awareness prokram shibynta ban ai jinghikai ïaki khun samla ba kim dei ban ngop ha u drok hynrei ban pynmlien ïalade ban shim bynta haki jingïalehkai kilan met ban ioh ka met ba koit ba khiah.
U la ong ruh ba katei ka jingïalehkai phutbol paralok yn wan ruh ban shim bynta da u Bah Eugeneson Lyngdoh uwei naki khlur ïalehkai phutbol ba paw ka jylla ba dei ruh u MLA barim ka UDP, ki MLA bad MDC jong ka party UDP ki ban sa aireng pyrshah ïaka Synjuk ki Rangbah Shnong Nongpoh Area.
U la pynpaw ruh ba kum ka party UDP ka dap da ka jingsngewkhia kaba jur halor ka jingjyllei u drok ha ka thaiñ Ri-Bhoi bad bun naki samla kila sdang ban ngop bad kyrni ha utei u jait jingdih buaid ha kaba la kyrpad ruh ïaki khun samla ban wan sakhi ïaka jingïalehkai phutbol bad kumjuh ruh ka jingai jinghikai halor u drok bad ki jingma kiba lah ban ktah ïaka met bad ka imlang ka sahlang.