Khlong noh ïa u shyiap na ka Wah Myntdu katkat kum ki dustur barim: KL Pariat

Jowai, K’Lyngkot 08: Kawei na ki seng treimon sngewbha ka ‘Khooid Ya ka Wah Myntdu’ (KWM) hadien ka jingïoh bat jong ki ïaki trok bad ka JCB kiba dang khlong maw na ki bynta ka Wah Myntdu ha ka por mynmiet kaba la jia haka 18 tarik u Naitung, 2023.
Na ka liang ka seng KWM khlem da shong kli kti halor ka jingdonkti jong u Contractor ban khlong maw beaiñ na ki bynta ka Wah Myntdu, na ka liang jong u Contractor hadien ka jingïakren sngewthuh jingmut lang ula kular ban siew kum jingai Donation kaba long 5,00,000/- (san Lak tyngka) shi bynta ban pynbha pynmiat ïa ka Wah Myntdu.
Ka seng mynta ka sngi 8 tarik u Kyllalyngkot, 2024 kala leit ban aiti ïa katei ka pisa ba 5 lak tyngka sha u Deputy Commissioner ka West Jaiñtia Hills District bah B.S Sohliya bad ïa kane ka pisa la leit ban thep haka Account No- 096001000454 jong ka ICICI Bank Jowai ha ka kyrteng jong ka West Jaiñtia Hills District-Environment Protection & Restoration Fund” ïa kaba la plie khnang ban peit ïa ka jingbha jingmiat ka Wah myntdu.
Na ka liang u Vice President ka KYM ma Bishar Shylla ha ka jingkren sha ki lad pathai khubor ula ong ba ïa kane ka pisa la ïoh ban aiti mynta ka sngi bad u kyrmen skhem lyngka kane ka pisa yn sa lah ban pynbha ïa ka Wah Myntdu ha ryngkat ka jingïatreilang jong ki paidbah bad ki tnad sorkar bapher bapher khamtam ha kine ki sngi ban wan.
Katba u ma Khroo L. Pariat ula buh ka jingkyntu ba la donkam ban khlong noh ïa u shyiap uba don ha ki bynta ka Wah myntdu, namar ka jingdon bun palat jong u shyiap kan wanrah jingma khamtam ïa ki dohum dohwah, nalor ka jingstang jong ka wah kaba buh jingma ha ka rukom pynpoi um bam ïa ka sor Jowai.
Ha ka juh ka por ula kyntu ïa utei u khlieh duh ka District ba un pyntreikam noh ïa ka rukom khlong ïa u shyiap na ki bynta ka Wah Myntdu kaba long katkum ka dustur jong ki longshwa manshwa. Ha kaba kino kino kiba donkam shyiap ki lah ban leit khlong na ka wah da kaba pyndonkam da ki khoh ki mohkhiew ban leit kit sha ïing ban shna ïa ki jingdonkam kumba long haki por mynshwa.
Ula ong kumba long mynta ka jingtheh kyndew sha ki bynta ka Wah Myntdu kala nang jur khamtam na ka jingpyntrei ïa u surok By Pass na Khliehtyrshi haduh Treïongriang. U kyrmen ba ki bor ba halor kin shim ka jingkitkhlieh ban peit ïa kane ha ryngkat ka jingïatreilang jong baroh kiba don bynta.