Haduh arshah kyntiew ka sorkar Bihar ïa ka jingsiew ïa ki nongïalam Panchayat bad Anganwadi

Patna, K’Lyngkot 08 : Ka kynhun Myntri jong ka Bihar ha ka sngi Nyngkong ka la pynbna ban kyntiew arshah ïa ka jingsiew bai burom sha ki nongïalam Panchayat kiba kham hakhmat nalor ka jingkyntiew ïa ka jingsiew sha ki Anganwadi.
Kane ka sienjam ba ka sorkar Bihar ka shim kadei ruh khyndiat bnai shwa ka elekshon MP.
Nalor kine, ka kynhun Myntri ka la mynjur ruh ban don noh la ka jong ka tnad kaban peit kyrpang na ka bynta ban kyrshan ïa ki nongïalehkai nalor ba kan don ruh ka la jong ka information technology policy ban pynlong ïa ka jylla ba kan lah ban kham khring bun ki nongbei tyngka.
“Ka kynhun Myntri ka la mynjur ban kyntiew ïa ka jingsiew sha ki nongïalam Panchayat bad ka stipend sha ki nongtrei Anganwadi ha ka jylla,” ong u Additional Chief Secretary u S Siddhart haba kren bad ki lad pathai khubor hadien ka jingïalang ka kynhun Myntri.
La ong ba ki Mukhiyas kin ïoh ïa ka jingsiew kaba 5000 tyngka shibnai na ka jingsiew kaba ki ïoh baroh shi katta 2,500 tyngka katba ki nongïarap jong ki, kin ïoh sha ka 2500 na ka 1200 tyngka ba ki ïoh baroh shi katta.
“Kumjuh ki sarpanch bad deputy sarpanch kin ïoh mynta 5000 tyngka bad 2500 tyngka shi bnai nangne shakhmat na ka 2500 bad 1200 tyngka ba ki ïoh mynshwa,” ong u ACS da kaba bynrap ba kane kan ai jingmyntoi ïa ki 2.50 lak ngut ki panchayat kiba don ha ka jylla.
Ha kajuh ka por la pynbna ruh ba ka sorkar kan siew ïa ka bai burom na ka 500 tyngka sha ka 800 tyngka ïa ki ward member.
Da katei ka jingkyntiew ïa ka jingsiew, ka sorkar kan hap ban pynlut tam haduh kumba 339 klur tyngka man u snem na ka pla tyngka jong ka sorkar.
Ka sorkar ka la mynjur ruh ïa ka jingpynkiew ïa ka jingsiew sha ki 2.30 lak ngut ki nongtrei anganwadi ha ka jylla. Kane ka mut ba kin sa ïoh noh 7000 tyngka shibnai katba ki nongïarap jong ki pat kin ïoh 4000 tyngka shibnai.
Baroh shi katta ki nongtrei anganwadi ki ju ïohi 5950 tyngka shibnai katba ki nongïarap jong ki pat ki ju ïoh 2975 tyngka.