Khlem poi ka VPP sha ka jingïalang jong ka All Party Meeting ban ïatai halor ka Reservation Policy

Shillong, Jymmang 06 : Ka Voice of the People’s Party (VPP) kaba don ha Liang Pyrshah jong ka Iiing Dorbar Thawain ka jylla ka khlem poi sha ka jingïalang jong baroh ki seng sain pyrthei ka jylla ne ka ‘All Party Meeting’ ba la lum da ka sorkar jylla ban ïatai halor ka kaiphod jong ka Expert Committee halor ka State Reservation Policy.
Ïa kane ka jingïalang la pynïaid da u Myntri Rangbah ka jylla Conrad K Sangma ha kaba la ailad ïa baroh ban ai jingmut halor ka kaiphod jong ka Expert Committee halor ka State Reservation Policy.
Ha kane ka sngi jan baroh ki seng sainpyrthei ki la poi lut sha ka jingïalang kynthup naduh ka National People’s Party, ka United Democratic Party (UDP), Bharatiya Janata Party (BJP), Trinamool Congress (TMC), Khun Hynniewtrep National Awakening Movement (KHNAM) ka Hill State People’s Democratic Party (HSPDP) bad kiwei kiwei ki la poi bad shim bynta ha ka jingïatai halor katei ka kaiphod jong ka Expert Committee.
Ka VPP ha ka shithi ba ka phah sha u KL Diengdoh, Deputy Secretary jong ka sorkar jylla ba peit ïa ka tnad Personnel & Administrative Reforms (B) Department, ka la pynpaw ba kin ym lah satia ban poi sha ka jingïalang.
Ha kane ka shithi ba la soi da u President ka party Bah Ardent M Basaïawmoit u la ong ba ka por kam ïahap satia na ka bynta kane ka jingïalang. “Ïa mynta hi ngi dang don bun kiwei ki kam kiba ïadei bad ka ishu kiba ktah ïa ka jylla bad ïa ki paidbah kiba donkam kyrkieh ïa ka jingtuklar jong ka sorkar,” u la ong da kaba bynrap ba dei halor kine ki phang kin ym lah satia ban poi sha ka jingïalang ba la buh.