Ka VPP ka khlem klet ïa ka Reservation Policy, ha u 2028 ngin jop 32 naka 36 ki Constituency: AMB

Jowai, Jymmang 06: U President ba Rangbah jong ka Voice of the People Party (VPP) u bah Ardent Miller Basaiawmoit haka jingkren jong u ha jingïalang ïakhih paidbah kaba la long haka 5 tarik ha Stand Ummulong Iawmusiang Jowai ula pynsngew ba ka party ka khlem klet ïaka Reservation Policy hynrei ngi dang don hapdeng ka jingïakren ïa ki ar tylli ki bynta.
Ha kaba ïadei bad kane ka kam thung kam thung jam hapoh ka jylla, u bah Ardent ula ong ka thong bad ka nongrim jong ka party ka long ban ïoh beit 47% ïa ki Khasi Jaiñtia na ka shispah, khlem da ktah ïa ka bhah 40% jong ki Garo.
“Kum ka party ka don ar tylli ki bynta kiba ka kwah ban pynsngew halor ka Reservation Policy kata kaba nyngkong ban leit ujor noh sha ka kashari bad kaba ar lehse ngin ap ynda la poi u 2028 ba ka party hi kan pyndep hi ïa ka kam”.
Ngim nym ai jingthoh shuh sha ka sorkar namar ngi la dep thoh shibun ki shithi bad to ai ba ka sorkar kan tip na ki lad pathai khubor ïa kine ki mat jingdawa ka VPP bad ban pynbiang kawei hadien kawei pat, ula kren shai ba ka jingïakhih kan bteng beit haduh ban da ïoh ka jingtip kaba shai.
Kum ka jait bynirew ‘phi dei ban kmen ba ka VPP haduh mynta ka dang mih ban hiar sha surok bad ban pynsngew ïa ki jingdonkam ka jaitbynriew wat haka kyrdan MLA ngi khlem lehraiñ ngin ïakhun khlem kynran dien haduh mynta’.
Ngi don ka jingngeit kaba skhem bad U Blei ula jubab ïa ka jingduwai, ka jingshañiah kaba ngi ïoh na u paidbah ka long naduh ka MP Election, ka MDC Election bad ka jingshañiah kan dang khlaiñ shuh shuh bad ha kane ka By-Election ngi don ka thong ban tam khambun ïa u 2024. Ha u 2024 ngi leit sha ka Election tang 4 ngut ki MLA hynrei mynta ngin leit sha u paidbah ha ryngkat ka nam jong u MP uba la pyndep hok ïalaka kam bad ha ryngkat ki 26 ngut ki MDC, ula bynrap shuh shuh.
Ha kane ka kynti la dei ban ban jop khambun tangba ngin dei ban sngewsarong bad u bah Ardent ula pyntikna ha u snem 2028 ka thong jong ka VPP ka long ban jop beit 32 ngut na ki 36 Constituency hapoh ka Rilum Khasi Jaiñtia.
Ha kajuh ka por ula pynsngew ba ka Party kala dawa ban weng ïa ki Dkhot kiba don jingïadei bad ki seng saiñ hima sima haki jingthung kam DSC bad MPSC, ha ka rukom khot Advertisement kala shim por da ki bun snem tang ban ap da ki brew la jong, kum ki paidbah dei ban sei beit ha ki kot khubor ïa ki briew kiba donkti haka kam thung kam beaiñ hapoh ki DSC bad MPSC, ong bah Ardent.
Da kaba u ong wat ki kam kiba don ha ki Hotel ba heh kum ha Shillong kiba bun ki kam la shimti da ki bar jylla sah satang ki kam barit baria la ai sha ki trai jylla.
Utei u President ula kynthoh ba ka sorkar mynta ka pyndonkam da ki Rangbah Shnong ban kren pyrshah ïa ki MLA jong ka VPP da kaba ai nuksa kumba jia ha Mawlai.