Khlem pat ïarap ka Sorkar ïa ki nongri masi ba shah ktah na ka jingpang at snieh doh

Shillong, Nailur 19: U Myntri ka tnad Animal Husbandry & Veterinary, u Bah AL Hek, u la ïathuh mynta ka sngi ha ïingdorbar ba ka sorkar kam pat ai kano kano ka jingïarap ïa ki nongri masi kiba la shah ktah na ka jingpang snieh doh ne ka lumpy skin desease.
U Myntri u la jubab ïa kane haba jubab ïa ki jingkylli ba la wanrah da u MLA jong ka Nongkrem, u Bah Ardent Miller Basaïawmoit.
Haba wanrah ïa ki jingkylli, u MLA ka VPP, u la ong ba kiba bun ki nongrim masi ki la hap ba khang noh ïa ki jaka ri masi ne ki farm jong ki namar ka jinglynshop kane ka jingpang snieh doh bad kane ka la ktah shibun ïa ka kamai ka kajih jong ki. U la ong ruh ba ka jinglynshop kane ka jingpang ka la ktah ym tang ïa ki nongri jingri, hynrei ka la ktah ruh ïa ki paidbah kiba ju bam doh masi bad kumjuh ruh ïa ki nongri masi kiba ju khem dud.
U Bah Hek, u la ïathuh ba ha ka snem 2020-2021, ka sorkar ka la ai jingïarap tang ha ka por ba don ka jingpang ïap sniang ha kaba ki nongri sniang kiba ka jingïap jong ki sniang ka long 540 tylli la ai jingïarap 16,20,000 tyngka.
U Bah Ardent u la buh biang ka jingkylli da kaba ong ba haba ka sorkar ka la ïarap ïa ki nongri sniang, hato kan ai jingïarap ne em ïa ki nongri masi. Na ka liang u Myntri u la jubab ba ka sorkar kan sa peit ïa kane namar ha ka por ba pang ki masi, ka sorkar ka la ai ki dawai bad ki injek ban ïada ïa ki masi na kane ka jingpang.