Shillong, Nailur 19: Ka nongmihkhmat ba la ih ha ka kam saiñ hima ka jylla ka kong Ampareen Lyngdoh, ka la pynpaw ka jingsngewkmen kaba khraw halor ka rai jong ka Sorkar Pdeng ban mynjur ïa ka Women’s Reservation Bill ba la mang kyrpang haduh 33% ïa ki kynthei hapoh ka ïing Dorbar Parliament bad ha ki ïing dorbar Assembly jongki jylla.
“Nga dap da ka jingkmen bad kane ka dei ka sngi ba kmen ïa baroh ki riewkynthei hapoh ka ri India bad nga kyrmen ba kane ka aiñ ka dei na ka bynta ki kynthei. Nga kyrmen ba ki ïing dorbar kin ailad ïa ki kynthei ha ka saiñ hima” la ong ka kong Ampareen.
Ka kong Ampareen ka la ong ba kam mut ba ki kynthei hapoh Meghalaya kim pat ju jop ïa ki ilekshon hynrei ka long kaba shisha ba ki kynthei ki shem jingeh ban ïakhun pyrshah bad kane ka jingmang kyrpang lypa kan plie lad ïa ki kynthei ban mih shakhmat ban ïakhun ban ïoh ka jingithuh kaba ki dei ban ïoh.
Ka la ong ba kam don satia kano kano ka jingduna ki kyrtong kynthei ha Meghalaya. “Ngi dei ki riewkynthei bad ngi dei kiba trei shitrhem ha baroh ki jait kam. Nga phaikhmat ban ïohi ïa ka jingtreikam jong kane ka Bill bad sngewsih ba kin don katto katne ki rangbah ki ban hap ai noh ïa ka kam sha ki kynthei bad kane kan dei kaei kaei kaba bha tam ban leh na ka bynta ka ri baroh kawei”ong ka MLA naka NPP.
