Nongstoiñ, Lber, 26: Ka jingbuhteng ban ïapynbeit ïa u pud u sam hapdeng ka Meghalaya bad Assam, ka la buh ïa ki paidbah kiba shong ba sah ha ki shnong khappud ha ka jingeh na ka daw jong ka jingwan tuklar bad pyndik jong ki pulit Assam.
Ka jingtuklar jong ki pulit Assam ka long haba ki pyntrei ïa ki kam pynroi ym tang kiba la bei pisa da ka sorkar jylla, hynrei wat ïa ki kam pynroi kiba la bei pisa da ka sorkar pdeng, kum ïa ka jingpyntrei ïa ka skhim Mahatma Gandhi Rural Employment Guarantee Scheme bad kiwei kiwei.
Kumban shu pynkynmaw ba ha ka taïew ba ar u Kyllalyngkot jong u snem 2021, ki pulit Assam kiba na Langpih BOP hadien ba ki Nepali kiba shong ha Lawbah ki la pyntip ba ka don ka jingpyntrei ïa ka surok ha ka shnong Umwali kaba dei na ka skhim MNREGS, kumta ki la wan bad ki la pynsangeh mar dor. U nongthoh khubor haba ïoh ban ïakynduh ïa ki nongshong shnong, ki la ïathuh ba naduh katei ka sngi ba ki pulit Assam ki la wan ban pynsangeh kim shym la trei shuh haduh mynta.
Kum ban pynkynmaw ba san snem mynshuwa, ki pulit Assam kiba don ha Langpih ki la pynsangeh ïa ki nongtrei jong ka MePDCL katba ki dang trei ïa ka laiñ ban pynpoi bording sha ka shnong Mawdiangsnam bad katei ka jingtrei ka la sah kut haduh mynta.
Ki paidbah na katei ka shnong Umwali, ki la kynnoh ruh ba katkum ka jingtip jong ki, ka jingtuklar bad pynsangeh jong ki pulit Assam na Langpih ban pyntrei ïa katei ka surok, kam dei satia kaba la bthah da ki bor ba halor hynrei ka dei tang ka jingleh jong u Incharge na Langpih. Kitei ki nongshong shnong ki la dawa ruh ba ka sorkar ka la dei ban pynbeit noh kloi ïa u pud u sam, khnang ba ki paidbah kin ym shah pyndik ha ki pulit Assam man la ka por.
