Khein be-aiñ ka sorkar ïa ki khyrdop lum khajna ka KHADC na ki jingri jingdup

Shillong, Naitung 10: U Myntri sorkar ba peit ïa ka tnat Animal Husbandry & Veterinary u Bah Sanbor Shullai ha ka sngi Thohdieng u la pynbna ïa ka khyrdop lum khajna ba la ai wai da ka Voice of the People Party kaba la ïalam ha Khasi Hills Autonomous District Council (KHADC) halor ka jingwan rung ki jingri jingdup sha kane ka jylla Meghalaya kum kaba “beain” bad u la ong ba ka tnad ka la bthah ïa ka council ban pynsangeh noh ïa kane.
U Bah Shullai u la ïathuh ba ka sorkar ka la ioh ïa ka jingujor ha kaba ïa dei bad ka work order ka KHADC kaba la ai sha u bah Francis L Nongbri na Mawlai Nongkwar ban lum khajna ïa ki jingri jingdup (mrad).
“Nga la pynkhamti ïa ka ha ki heh ophisar jong ngi ban eksamin la ka long kaba dei ne kaba be-ain”, la ong u Bah Shullai.
Hadien kane, ka Tnad kala thoh sha ka Tnad District Council Affairs (DCA) ha ka 30 tarik Jylliew, haba phah ruh ia ka hukum ka KHADC ba 1 tarik Jylliew ba shah ban pynieng ïa ka khyrdop ban lum khajna na ki kali kiba kit ïa ki jingri jingdup ha 19th Mile, Byrnihat na ka bynta u snem 2026-27.
Ha katei ka shithi, u Under Secretary u Bah P Lyngdoh u la ong: “La kyrpad ïa phi ban sngewbha ban pyntip sha ka KHADC bad sha kiwei pat ki Autonomous District Council jong ka jylla ba ym shah ban lum khajna haba rung.”
“Kumta ka long beaiñ, ngi la phah da ka jingthoh na ka tnad ban nym ailad ïa ka district council ban lum khajna ïa ka jingrung ki jingri jingdup” ong u bah Shullai.
U Myntri sorkar u la bynrap ruh ba la bthah ïa baroh lai tylli ki ADC ba kim dei ban shim bai khajna ha ki jaka rung ïa ki jingri jingdup.