Ka jingbuh ïa ka FTR Centre ha Umling ban kyntiew kyrteng ïa kiba rung sha Meghalaya ka long la kumba ïoh ILP hi : Shira
Shillong, Naitung 10 : U Myntri ka tnad kam jngohkai u Timothy D Shira mynta ka Sngi Thohdieng kum ka jingïada ïa ka sorkar u la ong ka jingrai jong ka sorkar ban buh ïa ka Facilitation and Tourist Registration (FTR) Centre ha Umling ban rejister ïa kiba rung sha Meghalaya ka long kumba la don hi ka ILP hapoh ka jylla namar lyngba kane la lah ban peitngor ïa kiba thmu ban rung beaiñ shapoh ka jylla.
Kane ka jingkren jong u Myntri ka long halor ka jingpyrshah jongka KSU ïa ka jingthmu ka sorkar ban buh ïa ki dukan bam ha katei ka jaka ha Umling.
“ Ngan ym kynthoh ei ei rh namar lada nga kynthoh kan wanrah bun ki kynrum kynram na kata ka daw ngam kwah ban ong ei ei halor ka jingkren jongka KSU” ong u Shira.
Haba kren halor katei ka FTR Centre u la ong ong ba kane ka jaka kan long kum ka jingpeitngor ïa kiba wan rung sha ka jylla bad kumjuh ruh ban phah rejister ïa ki kyrteng jongki.
Ka jingthmu jong ngi ka long ban peit ïa ka rung ka mih bad ban rejister ïa ki nongwan jngohkai shapoh ka jylla. Ha kane ka jingpynkhreh la buh kyrpang ar kamra ban pynlong ïa ka ophis ban rejister kyrteng. Kumta kan kham shim por ban pyndep ïa ka kam ban rejister te na kata ka daw la pynkhreh ruh ia ki jaka ban bam khnang ba ki nongwan kai kin ïoh ban pynkdang bad pynthynda ïa lade da ki jingbam bad jingdih umsoh bad ka dei kata hi ka jingthmu” ong biang u Shira.
U la ong haba rejister hap ban bishar ïa ki kot ki sla jongki bad kumjuh ruh shano ki thmu ban leit namar ha ka kyrteng jong ka jingwan jngohkai ju jia bun ki jingjia. Kumta ban tip kaei ka jingthmu jong ki nongwan jngohkai hap ban bishar bniah ïa ki kot ki sla bad kane hi kan kham shim por bha.
U la ong kane hi ka la long kum ka ILP namar wat haba leit sha Nagaland ruh hap ban rejister lyngba ka ILP hi.
U la ong ba kiba kum kine ki FTR yn shna ha kiwei kiwei ki bynta jongka jylla ruh kynthup ia ka ri lum Garo.
Halor ka jingkylli ba ka sorkar kam shim khia ne kam don ki kor ki bor kiba biang ban talasi ïa ki mynder ba wan rung beaiñ sha ka jylla u la ong mano ba ong ba ka sorkar kam biang bad kam shim khia namar ka don ka Infiltration Check Gate sa kaei pat yn dang donkam.