Shillong, K’lyngkot, 10: U Deputy Commissioner jong ka West Jaiñtia Hills u la pyntip sha baroh ki nongshong shnong ka West Jaiñtia Hills ba ki dei ban bud ryntih ïa ka hukum jong ka ïingbishar Meghalaya High Court ha ka PIL NO.7 jong u snem 2024 ba la khang ïa ka jingshna, ka jingpynïaid iew bad ka jingpyndonkam ïa ki plasitk kiba duna ïa ka 120 microns ka jingrben naduh ka 01.01.2025.
U la pyntip ruh ba ka ophis jong ka Chief Executive Officer (CEO), ka Jowai Municipal Board, u Inspector of Supply bad baroh ki Block Development Officer (BDO) kin sa thaw ïa ki lang jingpynsngewthuh halor ka jingkhang ban pyndonkam ïa ki Plastic ba pyndonkam tang shisien.
Kumba la kdew ha ka hukum u District Magistrate un ai bor ïa u Ophisar ban pynlong ïa ka jingjurip ba kyndit bad ban khynra ïa ki trai dukan ban khanglad ïa ka jingpyndonkam ïa ki plastic ba pyndonkam tang shisien bad ki tiar plastik kiba duna ïa ka 120 micron ka jingrben hapoh ka District.
U Deputy Commissioner u la kyrpad ïa ki paidbah ban kohnguh bad ïatrei lang bad ki bor sorkar khnang ba yn lah ban khang ïa ka jingpyndonkam ïa ki plastic kiba tang shisien pyndonkam bad kiba don hapoh ka 120 micron ka jingrben.
