Da ka jingdap 25 snem, kynmaw burom ka Snow White ïa u nongtem Lead Manfilson Lyngdoh

Shillong, K’ Lyngkot 10: Ka Kynhun tem ba pawnam bad kaba la rim tam ha ka jylla ka Snow White kum ka dak ka jingrakhe ïa ka jingdap 25 snem jong kane ka kynhun ha ryngkat ka jingïatreilang bad ka Seng Samla Riatsamthiah ha ka sngi Thohdieng ka la pynlong ïa ka jingkynmaw burom ïa u nongtem jong ka uba la khad noh u (L) Manfulson Lyngdoh.
Kum ka dak ka jingkynmaw ieid ïa une u nongtem Lead ka kynhun uba la khladnoh bad uba dei ruh na ka longïing kiba la seng ïa kane ka kynhun tem bad kiba sah hapoh ka Shnong Riatsamthiah, kane ka kynhun ka la pynlong syndon da ka Rock Concert.
Ha shwa ban sdang kane ka Rock Concert ba la pynïaid da ka kynhun tem Snow White ka la don ka jingkren na ka kong Amore, nangta na ka liang ka kynhun Snow White bad kumjuh ruh na ka liang u Rangbah Shnong u Bah M Kharkrang.
Hadien kane la pynbud sa ki jingpynbyrnia na ki kynhun bapher bapher kiba napoh ka shnong Riatsamthiah.
Ha kane ka sngi ka la don ruh ka jingai jinghikai pynsngewthuh paidbah halor ka jingkynrei bad ka jingma kaba u drok u la ktah ïa ka imlang sahlang da ka kynhun jong ka Meghalaya Aids Control Society bad hadien kane la pynbud pat sa ka tem ka put napoh ka kynhun Snow White.
Haba kren ha kane ka sngi na ka liang u Rangbah Shnong u Bah M Kharkrang u la ong, “Mynta ka sngi ngi la pynlong ïa ka Tribute Concert ïa u dkhot jong ka kynhun tem Snow White u (L) Manfulson Lyngdoh ba la ju khot ieid u Bah Hep uba la khlad noh ha u snem 2017 ha kaba ïa kane ka concert ha Riatsamthiah la pynlong da ka Snow White ha ka jingïatreilang bad ka Seng Samla Riatsamthiah bad da ka jingkyrshan ka Dorbar Shnong bad ka Meghalaya Aids Control Society.”
U la ong ruh ba kane ka jingkynmaw burom ka long ruh kum shibynta na ka jingdap kaba 25 snem jong ka Band Snow White. “U Bah Hep u la dei u Lead Guitarist ba mynshwa jong ka Band bad kane ka jingpynlong ïa kane ka concert ka long ruh kum shi bynta ban ong ‘Em ïa u drok’ kaba dei ka lynti kaba bha tam ban ainam aiburom ïa u (L) Manfulson Lyngdoh ha kaba ka shnong Riatsamthiah ka sngew sarong halor ki jingnoh synniang ha ka jingtbit jong u ha ka put ka tem,” ong u Bah Kharkrang.