Nongpoh, Rymphang 04: Kumba hynriew tylli ki karkhana kiba don ha ka shnong Byrnihat, Ribhoi District ha ka sngi Baar ki la shah khang khyrdep ha ka Meghalaya State Pollution Control Board (MSPCB) tang hadien ba u Mawphor ha kine ki khyndiat sngi u la pynpaw pyrthei ïa ka jingeh jong ki paidbah kiba shong basah ha ka thaiñ Byrnihat bad ha ki shnong kiba marjan ki la shah ktah na ka jingmih ka tdem jaboh na ki karkhana.
Ka jingmih ka tdem jaboh na ki karkhana ka Byrnihat ka la ïoh ïa ka nam ba nyngkong kum kawei na ki shnong ba jaboh tam hapoh ka ri India.
Ïa ka jingleit khang khyrdep da ka Meghalaya State Pollution Control Board (MSPCB) la ïoh jingtip ba nongtrei jong ka Board ki la hiar sha ka thaiñ Byrnihat ban khang khyrdep ïa ki karkhana kiba pynkheiñ ïa ki kyndon jong ka MSPCB bad kiba pynmih ïa ka tdem jakhlia kaba ktah ïa ki paidbah ha ka thaiñ Byrnihat.
Watla ka jingtip bad ka khubor ba thikna ym pat lah ban ïoh satia ki karkhana aiu kiba la shah khang khyrdep, hynrei la ïoh jingtip pat kumba 6 tylli ki karkhana ki la shah khang ha ka jingdonlang ki bor synshar ka Ri-Bhoi Distric..
Kum ban shu kdew hangne ba ka jingim ba manla ka sngi jong ki paidbah ka thaiñ Byrnihat ka la shah ktah shikatdei khamtam ki nongrep, ki khynnah skul bad kiwei kiwei bad kane ka la buh ïa ka jingeh kaba khraw na ka jingmih ka ka tdem jaboh na ki karkhana khamtam ka tdem iong kaba mih na ki atoskhana kiba lang tylli tylli kaba ktah wat ïa ka koit ka khiah jong ki paidbah.
