Nongpoh, Nailar, 14: Ki Pulit ka Ri-Bhoi hadien ka jingioh jingtip kaba bñiah halor ka jingdon kawei ka kali kaba la suba bad kit ïa u drok ha ka sngi Balang ki la pynap shrip ha Nongpoh bad ioh bat ïa kawei ka kali kaba don ïa u number ML 10 C 0012 kaba dang wan naki thaiñ Byrnihat ba la ñiah da u Vicky Lyngdoh (23) naka shnong Pahammawleiñ, 20 mer, Ri-Bhoi District.
Ha ka jingtalasi jong ki Pulit ki la ioh ban kurup ïa u drok heroin iba khia kumba 2.47 gram, san tylli ki thyrnia injek bym pat pyndonkam bad ki Pulit ki la pyndep ïa ka jingtohkit katkum ki kyndon jong ka NDPS Act hakhmat ka jingdonlang jong ki nongsakhi.
Ki Pulit ki la kem ïa u Vicky Lyngdoh bad register case ha Nongpoh Police Station bad ka jingtohkit ka la iaid shakhmat ban lap shuh shuh ïa kiba donkti.
