Kem ki Pulit ïa u Simon Shylla ba ïaroh ïa ki lehnoh ba siat ïa ki Tourist ha Pahalgam

Shillong, ïaïong, 05: Ki Pulit ka Meghalaya ha ka sngi Palei ki la kem ïa uwei u briew uba la tip kyrteng kum u Simon Shylla, 30 snem ka rta na ka shnong Umlyngka, Upper Shillong halor ka jingïaroh ïa ki lehnoh kiba donkti ban siat ïap ïa ki nongjngohkai pyrthei ha Pahalgam dang shen.
Ha u kyrwoh ba la phah da u Superintendent of Police ka East Khasi Hills Bah Vivek Syiem u la ong, “la ïoh jingtip na kiba bun balang shaphang uwei u briew uba la ai kyrteng kum u ‘Man Shylla’ uba la kynthoh pyrshah ïa ka ri ha ka video ba la pynmih da ka Northeast Live News ha kaba ïadei bad ka jingsynreit kuli jong ki lehnoh ïa ki nongjngohkai pyrthei dang shen ha Pahalgam da kaba ai jingkyrshan ïa ki lehnoh ha ka kam pynïap briew bad kyntu ruh ruh ïa ki lehnoh ban sdang kum ïa kine ki kam thombor pyrshah ïa kawei ka jaidbynriew ha North East lyngba ka Facebook Account kaba u la ai kyrteng “Man Shylla”, bad kane kan buh jingma ïa ka jingïatylli bad ka jingïalong kawei hapoh ka ri.”
Ki Pulit jong ka Special Cell, East Khasi Hills, tang shu ïoh jingtip halor kane ki la leit kerkut ïa ka ïingsah jong u Simon Shylla, 30 snem ka rta ha Umlyngka.
Na ka met jong u, ki Pulit ki la kurup ar tylli ki mobile phone bad ïa ka case la rejistar ha Lumdiengjri Police Station hapoh ka Section 113(3)/196(1)(a)/147 BNS. Ïa u Simon yn sa tian bishar ha Kashari ha ka sngi Thohdieng.
Ha Assam, ki Pulit ki la kem ïa u MLA ka AIUDF u Aminul Islam, uba mihkhmat ïa ka Dhing, halor ka jingpynmih ïa ki jingkynnoh ba pynïapher jaidbynriew da kaba kdew ïa ka jingjia ba dang shen ïa ka jingsynreit kuli ki lehnoh ha Pahalgam bad ha ka jingjia ha u snem 2018 ha Pulwama.
U Islam, ha ka rally kaba la long ha ka 23 tarik mynta u bnai u la kynnoh ba u Myntri Rangbahduh ka ri u Narendra Modi bad u Myntri ka tnat Kam Pohing u Amit Shah ki dei kiba don bynta ha kine ki jingjia, khnang ban pyndonkam na ka bynta ka jingmyntoi saiñpyrthei.
“Lada ka Sorkar kam lah ban sei madan ïa ki jingshisha, ngi hap ban ngeit ba u Narendra Modi bad u Amit Shah ki dei kiba donkti ha lyndet kine ki ar tylli ki jingshah hiar thma,” ong u MLA ka AIUDF haba kren ha ka rally na ka bynta ka elekshon Panchayat.
Dang shen, u Myntri Rangbah ka Jylla Assam u Himanta Biswa Sarma u la wohnia ruh ïa u MP ka Congress na Assam u Gaurav Gogoi halor ka jingleit iuhkjat sha ka ri Pakistan bad kynnoh ruh ba u lah ban don ka jingïadei bajan bad ki bor synshar jong ka ri Pakistan.