Nongpoh, Naiwieng 30 : Ki pulit jong ka Ri-Bhoi kila ioh ban kem 3 ngut ki briew kynthup kawei ka longkmie hadien ba kila phet krad naka jaka theh petrol khlem siew pisa ha kawei ka petrol pump ha 10 mer Khanapara.
Katkum ka jingtip bala ioh lum, la ïathuh ba kitei ki 3 ngut kila wan ban theh petrol ha kawei ka petrol pump bala tip kyrteng kum ka HP Pterol Pump kaba don ha 10 mer, haka janmiet jong ka sngi ba ar da kawei ka kali kaba don ïa u number AS 01 AJ 1610 hynrei hadien bala dep ban thep petrol kumba T.3800/- kitei ki 3 ngut kila phet krad noh na katei ka jaka khlem siew pisa.
Hadien katei ka jingjia naka liang ki nongtrei jong katei ka petrol pump kila pyrshang ban beh thong ïa katei ka kali bad ioh bat noh ha ka thaiñ 9 mer bad aiti sha ki bor pulit ban leh ïa kaba donkam bad naka liang ki pulit kila kem noh ïa kitei ki 3 ngut bad ka jingtohkit kan dang ïaid shakhmat. Naka liang ki nongtrei jong katei ka petrol pump kila ïathuh ba kum kitei ki jingjia kim dei shuh kiba dang shu jia hynrei kila ju don ruh naka por shaka por kiba jut heh umphñiang khlem siew pisa.
