Shillong Lber 26: Hadien ka jingïoh jingtip kaba thikna ba ki don ki snar kiba la leh ïa ki kam runar kiba donkti ban khaïi ïa ki briew sha Bangladesh lyngba u pud u sam ka India Bangladesh na ka liang ki BSF ki la leit ban wad ïa u Sukur Janab Shaikh uba la wan na Mumbai sha Guwahati bad ka kynhun ki nong Bangladeshi.
Ha kaba ïadei bad kane na ka liang ki pulit ka Ri-Bhoi ki la pynlong ïa ka jingtalasi ha ka Train No. 15945 (LTT-Dibrugarh Station) ha Kamakhya Junction bad Guwahati Junction.
Watla ïa u Sukur Janab Shaikh ym lah ban shem, hynrei ki la don pat ki jinglap haba ïadei bad ka kam jong u kaba la lam sha ka jingïoh bat ïa ki 11 ngut ki nong Bangladeshi ba kynthup ïa ki 2 ngut ki khynnah na mobile check post kaba la buh ha Byrnihat OP.
Ïa kine ki briew la lap ha ka por ba ki dang shong ha ka kali Tata Sumo kaba don u Registration No. AS-01-EC-3528, ïathuh ki pulit.
Ïa kine ki briew ba wan rung beaiñ la ithuh kyrteng da Kakali Sardar ba la 36 snem ka rta, Hirina Dili Mulla ba la 30 snem ka rta, Unjilla Sadar ba la 32 snem ka rta, Rabia Begum ba la 37 snem ka rta, Panna Kamal Hussain ba la 42 snem ka rta, Poppy Hasu Mollah ba la 26 snem ka rta, Sonia Shaikh ba la 24 snem ka rta, Sobha Islam ba la 28 snem ka rta bad u Saja Uddin Sk ba la 26 snem ka rta, ïathuh ki pulit.
Na ka liang u SP ka District u Vivekananda Rathore u la pyntip ba ka jingtohkit halor kane ka kam ka dang ïaid bad da ka jingïarap ki pulit ka Assam la ïoh ban kem ïa u Sukur Janab Shaikh @ Sukur S/o (L) Janab Sheikh, R/o Koralia, District – Narail, Bangladesh uba la shah kem na Nalbari District ha kane ka juh ka sngi.
La ïathuh ruh ba kine ki briew ki la sah beaiñ ha India bad la lap ruh ba ki la don ïa ki identity card kiba thok kum ka Aadhaar Card, PAN card, bad kiwei kiwei. U la ïathuh ruh ba ki thmu ban leit sha Dawki ban jam sha shilliang u pud u sam ka India Bangladesh ha ka por mynmied ne ha ka por mynstep.
Na ka liang ki pulit ki la register case ha Nongpoh police station.
“Baroh kine kiba la shah kynnoh ki la shah kem bad ka jingtohkit ka dang ïaid ha kaba ïadei bad kane ka jingjia,” bynrap u SP.
