HT Wells
Ka result SSLC jong ka MBOSE 2025 kaba la pynbna ha ka sngi Saitjaiñ 05.04.2025 lehse kan dei kawei ka result kaba pynkmen bha ym tang ïa ki khynnah skul hynrei wat ïa ki kmie ki kpa, namar ka dei ka sien ba nyngkong ha ka history jong ka Meghalaya ba ka percentage jong kiba pass ka poi haduh 87.10% namar na ki 63,682 ngut kiba ?akhun, haduh 55,473 ngut kiba pass.
Ka sorkar MDA 2.0 jong u Conrad K. Sangma ka lah ban shim burom ha lade ïa katei ka jingpass bha jong ki khynnah, hynrei to ngin ïapeit bniah halor katei ka result la ka long shisha ne em kaba dei ban ïoh jingïaroh?.
Nyngkong eh kum uwei na ki nongpeit pyrman ïa ka jinglong jingman jong ka longbriew manbriew, u nongthoh u ïohi ba ka jingim ka la nanghiar arsut pynban.
Ka jingpass matric jong ki khynnah ha kane ka kynti kam ïapher ei ei na ka jingpynpass jubor jong ka sorkar ïa ki khynnah ha kito ki artylli ki snem Lockdown jong ka Covid-19. Namar la shem ba ki khynnah kim lah ban ïa compete bad kiwei pat kiba pass na ki Board of Exams. Phin peit nangne shakhmat lei, tip kin lait ne em tang ka Central University Entrance Test (CUET)?. Namar kine kiba la pass kiba la shu poi salit sha ki kyrdan B.A ne BSc lada phin phah thoh ïa ki tang iwei i shithi ujor sha ka sorkar ba kyrduh um ne bym don dinglight kim nang bad lada ki kmie ki kpa ki phah kheiñ sut (interest) haba ki ai ram ïanoujore ïano, kata lei lei ka la eh than, bad ki da saw kyrang har. Lada kin ïaleh interview kam, kata lei te ki la khynñiuh that that. Uta u dei u soh jong ka jingpynpass jubor. Phi ha ki por hyndai khamtam sha ki thaiñ kyndong, haba ki kmie ki kpa kim pat nang ban ñiewkor ïa kata ka quality edication, ki ong; ‘to khie me shu leit skul tang ba men nang ban soi kyrteng bad thoh shithi samla’; hynrei ha kane ka juk kam dei shuh kumta, lada bakla, la sah kale baroh shirta. Ka jingïaleh matric mynta ka la suk shaba palat, nalor ba la don lypa ki marks ba tyngkai lyngba ka internal exams, don sa kiwei pat ki objective types kiba jem bad ka suk, nangta, sa kata ka so-called CM Connect Guidebook.
Kaba pynlyngngoh ka long ba ha cover jong kata ka kot CM Connect Guidebook lei la buh kynjreng da ka dur jong u Conrad Kongkal Sangma syndon khnang ba ki khynnad skul kin ïohi pylleiñ ïa ka dur bhabriew jong u Chief Minister. Kan ïapher aïu kata ka jingleh na ka kot ba ki RSS ki pyrshang ban shon ïa ka dur jong u ‘lei Ram ne Hanuman jong ki ha ki textbook jong ki skul?.
Hooid, ka jingthmu jong Chief Minister ka long ban ïarap ïa ki khynnah skul kiba don ha Garo Hills khamtam haba ka percentage jong kiba pass Matric ka duna palat man la ka snem, don ki district ha katei ka thaiñ lei ki bym cross ïa ka 25 percent. Katkum ka data jong ka state education department, haduh lai snem kynthih, don 36 tylli ki school kiba ïoh zero percent kiba pass, katba ka snem 2024 lei don 124 tylli ki school jong katei ka thaiñ kiba khlem don ba pass mano mano ruh. Ka jingmut jong u CM ka long ban ïarap ïa kita ki khynnah da kaba ai da ki jingkylli bad jinghikai khyllung khnang ban pynkiew ïa ka percentage. Ïa katei ka CM Connect Guidebook lah ban ?oh lyngba ki internet, mobile phone bad kiwei kiwei. Kan pynsuk ym tang ïa ki khynnah skul hynrei wat ïa ki nonghikai ruh.
Ka phawer u Aesop ka ong “Don ka ma haba la than eh ka suk”, haba kwah than eh tang ïa ka suk khlem pynshitom ïalade te shano keiñ kan lam?. Ka Chinese proverb ba pawnam ka ong ‘wat pynmlien ban shu ai dohkha ei ïa u briew man ka por hynrei hikai ïa u kumno ban khwai’. Ka China ka kiew nadong shadong dei namar katei ka nongrim ba ka kynto ïa ki briew jong ka ban trei shitom ym ban shu pyntian shamoit.
Wat la ki khynnah skul bad ki kmie ki kpa ki kmen tohhoh halor kane ka Result SSLC 2025, pynban u Lyoh badum u kah ïa ka lawei jong ki khun ki kti jong ki, namar kumba la kdew haneng, ka long thik kumba shu pynpass jubor ha ka por Covid-19, ki khynnah kim don jingnang jingtip ei ei. Ha ka jingshisha, ka sorkar ka dei ban buddien bha ïa kito ki Batch jong ka 2020-2021 naduh Class-XI haduh Class-XII eiei ban khang pyrkhing, ban hikai bha noh ïa ki namar ba ki shu pass ei khlem pynshitom khnang ba kin lah ban compete bad kiwei pat ynda ki la leit shabar jong ka Jylla.
Kum ka jingpynkynmaw, ïa ki student jong kane ka Juk, ha ki por ba mynshwa ki briew ki da phieng ban ïakren wat tang uba pass Middle English Leaving Certificate ynnai ïakren bad uba la pass Matric bad B.A lei. Ka daw ka long, ba ha katei ka juk, kiba ïaleh matric haduh ban da tdem hi puk ka khlieh ban pynkhreh Selection Test ïa ka HSLC ban shah select, ki hap ruh ban pynbthie jabieng ban khreh matric hadien ba la pass selection, namar ba ka jingïaleh Matric ka long ym tang ïa ka Class-X kumba long mynta; hynrei hap ban revised namar ba ki set jingkylli naduh ka Class-VII haduh ka Class-X. Dei namar kata ka daw kiba pass matric ha kito ki por, ki don shisha ïa kata ka ‘quality education’ ha ki. Phin phah kheiñ sut, phin phah kheiñ ïa ka area jong ka jaka ne phin phah thoh dorkhas sha kino kino ki tnat jong ka sorkar ne ki kam shnong kam thaw, ki thoh bad ki kheiñ sak sak khlem jingwit. Sangsot ïa kiba pass matric mynta, imat lada phah draft tang ka shithi samla ruh kim nang shuh, shu ong ba ka dei ha ka juk mobile te ym donkam shithi shuh te ka shu biang la ka biang hi.
Hiar arsut ka longbriew manbriew namar kata ka human resource development ka la hiar lypa naduh ki nonghikai haduh ki shah-hikai ba haduh ka sorkar hi ruh. Ka jingpynshlur ban phah tution ïa ki khynnah ruh ka dei kawei ka lad ba pynhiar kyrdan ïa ka education, namar ki
nonghikai kim i don por shuh ban hikai bniah ha klass hynrei ki ïaleh beit ban hikai bha ha ki private tution jong ki. Nangta, ka jingbym lah shuh jong ki nonghikai ban ai dieng sympat ha ki klass ka ailad ïa ki khynnah ba alhia bad mutlop ban lehmon, namar lada ki leh kumno kumno ruh ym don ba nud ban pynshitom ïa ki.
Ngi im ha ka spah snem ba Arphewwei, kiwei ki jylla ha India ki la nangïaid shaphrang katba ka Meghalaya pat ka ïeng khlemraiñ ha ka position ba shatdong duh jong ka Ministry of Education’s Performance Grading Index (PGI) 2021-2022. Kat kum ka thymmei ba thikna bha, ka Kerala, Maharashtra bad Punjab ki dei ki jylla kiba la lehbha wat ha ka por jong ka khlam Covid-19 ruh. Te sngewlehraiñ palat ïa ka la ka jong ka jylla, wat la ñiew ïa ka kum ka shlem jong ka jingnang jingstad ha North-East India ruh. Kumta, ban kyntiew ïa ka pule puthi kam dei lyngba ka jingsam ïa ki M-Tab ne Computer hynrei ban ïatreilang bad ki kmie ki kpa kumno ban kyntiew ïa ka rep ka riang bad ka ïoh ka kot jong ki khnang ba kin nym pynbunkam than ha ki khun jong ki ban leit trei leit ktah ha ka por ba ki pule kot.
Ka sakhi ba shaikdar ba ngi la hiar ha ka pule puthi ka long ba ngim lah shuh ban ïoh IAS officer da ki briew lajong nalor jong i Kong Isawanda Laloo, namar kitei ki daw ba la kdew haneng, la long kumba pynpass peit kot tuh pynban ïa ki khynnah, te shano yn poi ynda la ?a compete ha ki lympung jong ki Competitive Exams bad Administrative Services bapher bapher.
Ka jingdawa ban weng noh ?a katei ka CM Connect Guidebook ka long kaba dei por eh, ha ka jaka jong kata, ka sorkar ka dei ban wadlad da kiwei pat ki rukom ym tang ban thmu score point ha ka 2028 election. Hynrei donkam ka jingphaidien ban peitbniah hangno ba don jingduna (lacunae), kumno ban kyntiew ïa ka human resource development ha ka Jylla. Ban pynkhyllew ba ka la kiew ka percentage bad hiar pat ka standard jingnang jingstad kam ïapher ei ei na uto u matlah uba sngewbang ban ïaid pawang ha surok rong wat la u hap kynsan sha riat ruh um tip eiei. 53 snem ka rta, ka Meghalaya ka la dei ban trei kum u rangbah uba la ihbha ka jingmut jingpyrkhat ym kum u khyllung. Ka donkam ïa ki nongïalam kiba ïohi jngai ym kiba shu kwah burom. Ban pynkut, uwei u nongthoh bakhraw u Sydney J. Harris u ong, “Ka jingthmu ba kongsan jong ka Education ka long, ban pynkylla ïa ka ïitkhmih sha ka jingkhangïit (The whole purpose of Education is to turn mirrors into windows).