Kat bym pat pynkynriah ïa ki 342 tylli ki longïing ym pat sngew shngaiñ ki nongñiah kali

Shillong, Naiwieng 04: Hadien ba ki bor synshar jong ka East Khasi Hills District ki la pyllait biang ïa ki kali ban ïaid lyngba na Ïew Mawlong sha Bimola, kiba bun ki nongñiah kali ki la pynpaw ba kim pat sngew shngaiñ satia katba ka Sorkar kam pat pynkynriah ïa ki 342 tylli ki longïing na Them Ïewmawlong namarba ki sheptieng ïoh ka wan jia biang kumba la jia ha u snem 2018.
Hadien hynriew snem ba la plie biang ïa ka surok na Ïew Mawlong sha Bimola ha ka Lah Sngi u Blei, naduh ka por 7:00 baje mynstep ki Pulit ki la ïeng lypa ha Motpran bad ha Them Ïew Mawlong ban pynbeit thymmai ïa ka jingïaid jong ki kali na Ïew Mawlong sha Bimola.
Kum ban shu pynkynmaw, ka jingkhang dam ïa ka surok na Them Ïewmawlong ka la jia hadien ba la mih ka jingïakynad kaba jur ha u snem 2018 hapdeng ki katto katne ki nongñiah ïa ki Bos STPS bad kiwei pat ki jaidbynriew kiba shong basah ha Them Ïewmawlong kat haduh ba ka la pynkhihwin ruh ïa ka nongbah Shillong baroh kawei bad ka la mih ruh ka jingdawa ïa ka Sorkar Jylla ba dei ban kyndang noh ïa ki briew kiba shong sah ha Them Ïewmawlong.
Ha ka jingïakren bad ki katto katne ngut ki nongñiah kali, ki la pynpaw ba ka Sorkar ha ka jingshisha ka ladei ban weng shwa ïa ki briew kiba sah ha Them Ïewmawlong namarba lada jia eiei kine ki jaitbynriew kin ïamih da ka kynhun bad kumta kam pat long kaba shngaiñ ïa ka leit ka wan bad ka ïaid ka ieng jong ki paidbah katba ym pat lah ban pynkynriah ïa ki.
Katkum ka jingpynbna paidbah ba la pynmih da ka Deputy Commissioner ka Kong RM Kurbah, ka jingplie ïa kane ka surok manla ka sngi, kan long tang naduh ka por 8:00 baje mynstep haduh ka por 4:00 baje janmiet.
Halor ka jingai por ban ïaid kali tang haduh ka por 4:00 baje janmiet, ki nongñiah kali kamai ki la pynpaw ka jingpyrshah da kaba ong ba ka Sorkar ka la dei ban ai por haduh 7:00 baje janmiet khnang ba ki nongshong ïew ruh kin ïoh ban wanlang da ki kali kamai.
U Superintendent of Police (Traffic) u K. Prasad ha ka jingïakren bad ka kynhun lum khubor u la ïathuh ba ka jingbuh ïa ki Pulit pynïaid kali ha Them Ïewmawlong ka long ban pynthikna ba kan ym don shuh ka jingdheng kali.
U la kyntu ïa ki paidbah bad kumjuh ruh ki nongñiah kali ba kin ïatreilang bad ki Pulit kiba pyrshang ban pyllait ïa ka jingdheng kali ha kane ka kad khaïi kaba la buh jingeh bha ïa ki nongleit nongwan.
Katto katne ngut ki riewpaidbah, ki la pynpaw ba ka jingpyllait biang ïa ki kali ban ïaid lyngba na Ïew Mawlong sha Bimola ka biang palat hynrei ki ong ka Sorkar ka dei weng shwa ne pynkynriah ïa ki briew kiba sah ha Them Ïewmawlong namarba ki sheptieng ïoh ka wan jia biang kumba la jia ka jingïakynad hynriew snem mynshwa.