Shillong, Nailar, 24: Hadien ba ka la don ka jingïakren la ka Congress kan wengnoh ïalade na ka jingiatreilang bad ka NPP hapoh ka KHADC, hynrei u MDC ka seng Congress uba dei ruh u Deputy CEM ka KHADC u Bah P N Syiem u la ong ba ka jingïatreilang ka party bad ka NPP ha KHADC kan ym ktah ïa ka election, namar hap ban ïatreilang na ka bynta ka bha ka miat jong ki nongshong shnong bad kane ka jingïatreilang ka dang long kaba donkam kaba long kum ka jingnoh synniang lem na ka bynta ki paidbah.
“Ka jingrem ka jingjop uno uno u nongmihkhmat ka shongeh ha ki rukom treikam jong u ne ka, bad lada phi trei bha ha la ka jong ka constituency ngam tharai ba kan don ka jingktah ha ka election,” ong u Bah P N Syiem.
U la ong ba ki dang don bun ki Bill bad khamtam ka jingpynthymmai ïa ka khyrnit kaba 6 kumta dang donkam ka jingïatreilang.
U la ong ba ka jingweng noh jong ka Congress ban kyrshan ïa ka NPP ha KHADC ka shong ha u President bad ka State MPCC bad ki nongïalam ba hakhmat eh jong ka party ban shim ïa ka rai kaba khatduh.
Haba kylli shaphang ka jingpynlong noh ïa ka MDC election hadien ba la pdiang bad mynjur ïa ka kaiphod jong ka Delimitation Committee bad ba ka jingpynjlan ïa ka ïing kan kut ha ka 5 tarik u Nailur, u Bah P N Syiem u la ong ba na ka liang jong ka EC kaba mynta ka la pyndep ia la ka kam ram bad mynta ka shong sa ha ka sorkar ban rai halor ka election MDC.
Lah ban pynkynmaw ba dangshen u Chief Electoral officer ka Meghalaya u Sanjay Goyal u la ong ba ha election shiteng samoi sha ka Gambegre constituency kan long hapoh ka 4 tarik u Nohprah hynrei kumba ka long mynta pat ïa ka election MDC ka sorkar ka dang sngap jar jar bad hadien ba la mynjur ïa ka kaiphod ka Delimitation Committee bad sa ban ïoh ïa ka jingshon muhor u Lat ka jylla, ka sorkar kan hap sa ban sdang ïa ka electoral roll na ka bynta ki shnong ne constituency kiba la shah phiah bad lehse kane ruh kan sa long ruh sa kawei ka lad ban dang hap pynslem ïa ka election MDC.
