Shillong, Nailar 24: Ka seng kaba don ha ka liang pyrshah ka All India Trinamool Congress (AITMC) ka la rai ban pynïeng da ka longkmie kaba dei ruh ka MDC ba marwei hapoh ka Garo Hills Autonomous District Council (GHADC) kum ka kyrtong jong ka ha kane ka election shiteng samoi ka ban sa long hapoh Gambegre Assembly seat.
Haba kren sha ki lad pathai khubor u nongïalam ka party bad u Myntri Rangbah barim ka jylla u Dr. Mukul Sangma u la ïathuh ba u President jong ka Pradesh Trinamool Congress Committee u Bah Charles Pyngrope bad kiwei pat ki dkhot jong ka election committee ki la ïasyllok ban khmih ïa ka application jong ka kyrtong ka party kaba dei ka MDC na Dengnakpara, ka Sadhiarani M Sangma, kaba dei ruh ka kurim jong u para jong u, uba dei ruh u MLA barim ka Rangsakona u Zenith M Sangma.
“Ka committee da kawei ka sur ka la shim ïa ka rai ban mynjur ïa ka kyrteng ka Sadhiarani na ka bynta ban ïoh ka jingpynskhem kaba khatduh ba kan long kum ka kyrtong jong ka TMC na ka bynta kane ka election shiteng samoi napoh Gambegre. Kumta ngin ap ïa ka jingpynskhem jong ka chairperson bad shen yn sa pynbna ïa ka kyrteng shisien ba la mynjur da ka Chairperson,” u la ong da kaba bynrap ba ka party ka la ïaid shakhmat shaduh ki shnong ki thaw bad ki dkhot ka seng ki la trei shitom ba ka party kan ïoh ka jingjop napoh Gambegre seat.
Ïa kane ka election shiteng samoi la pynlong hadien jong ka jingiehnoh kam u nongïalam bad u MLA ka Congress u Saleng A Sangma hadien ba u la shah jied kum u MP ka Tura.
