Shillong, Jylliew 28: U Myntri Rangbah ka jylla u Conrad K Sangma ha ka sngi Thohdieng u la ong ba ki kam kiba rit baria lah beit barabor ban ïa pynbeit hynrei kam long kaba suk ïa ka sorkar ban mab lut ïa baroh ki kam beaiñ ne ‘blanket amnesty’ ba la leh da ka seng Hynñiewtrep National Liberation Council (HNLC).
Haba kren sha ki lad pathai khubor u Sangma u la ong ba ka sorkar jylla ka la ïakren bad ka sorkar pdeng halor ki jingdawa jong ka HNLC.
“Ngi dang ïakren bad ka sorkar India bad ngi la kren da kaba shai ba kaei kaba ka sorkar jylla ka lah ban leh kan ïai bteng ban ïakren bad ka HNLC bad ki dkhot bunsien lyngba ka sorkar pdeng. Kumta ki don ki kam kiba hap ban bud haba ïadei bad kane ka jingïakren,” u la ong da kaba bynrap, “Kumta ngim shym la kynriah na kine ki kam ha kaba ïadei bad ka jingïakren bad ka seng HNLC.”
U Myntri Rangbah u la ïathuh ruh ba baroh artylli ki sorkar ba kynthup ïa ka sorkar pdeng bad sorkar jylla la ong ban ïakren ïasyllok halor kine ki kam.
Ha kane ka snem ka HNLC ka la wengnoh na ka jingïakren ïasuk ha kaba ka la kynnoh ban ïakren bad ki jingdawa jong ki khamtam eh ban mab ïa ki kam bym man ne beaiñ jong ki nongïalam bad ki dkhot jong ka.
Haba phai shaphang ka jingïai bteng ka HNLC ban sam ïa ki shithi dawa pisa na ka liang u Sangma u la ong, “Ngam tip kumno phin batai haba phah ïa ki whatsapp message bad ha kine ki sngi ka long kaba suk ban phah ïa ki whatsapp message hynrei ngi dang wad ki lad ki lynti ban ïoh kem ïa kine.”
“Ngi la dep ban ïakren ha ka jingïalang kaba la long ha police headquarters hynne ka sngi bad nga la kyntu ïa u DG bad ban pynbha bad pynlut halor kane ka bynta khnang ban lah ban pynsangeh ïa kum kine ki kam dawa pisa sha ki nongshong shnong,” u la pyntip.
Haba ïadei bad ka sleeper cell ka HNLC kaba la ïoh ban kyndang dangshen, u Myntri Rangbah u la ong, “Ka Sleeper cell ka long kum ka kyntien kaba khlaiñ, bad kadei sa kawei pat ka kyntien kaba la ong ba kadei kaba la pynim biang.”
“Ngi la pynkhlaiñ ïa ka cyber cell bad ngi pynthikna ba ngin pynlut khambun halor kane ka kam. Kumba nga la ong kine ki riew shimet ki don ha ki kyrdan bapher bapher, ba la pyndonkam da ki nongïalam khamtam na ka seng HNLC.
