Ka UDP lah ban sah satang 1-2 ngut ki MLA, nga dang ïasyllok bad ki nongkyrshan: Paul Lyngdoh

Shillong, Nailur 25 : U MLA ba la rim bha jong ka UDP na West Shillong, u Bah Paul Lyngdoh, ha ka sngi Thohdieng u la ong ba ka United Democratic Party (UDP) ka lah ban nang duna bad sah sa tang 1 ne 2 ngut ki MLA hadien ba ka jingkylla ha ka saiñ pyrthei ka la ktah jubor ïa katei ka party.
Shuh shuh u la ong ba wat ïalade ruh u la sdang ban ïasyllok bad ki nongkyrshan jong u shwa ban shim rai shaphang ka lawei jong u ha ka saiñpyrthei.
Haba kren halor ka jingleit ïasoh jong 8 ngut ki MLA jong ka UDP bad ka BJP ha Delhi dang shen, u Bah Paul u la kynthoh jur ïa ki nongïalam jong ka party, da kaba ong ba ki kyntait ban pdiang ba don jingbym sngewtynnad hapoh ka party.
“Nga la kren bun sien hapoh ka party ba don shibun ka jingbym hun ïa ka rukom treikam bad jingïalam ïa ka party, hynrei kaba sngewsih ka long ba na ka liang ki nongïalam jong ka party ki dang kyntait bad ong ba ym don ei ei kaba bakla, ba ngi dang ïaid lang, ngi long kawei, bad ngi hun ïa ka rukom treikam,” u la ong.
“Kumta kane ka jingjia ka pyni shai ba hapoh ka jingïalam jong u president ba mynta, ha kine ki lai snem ngi ïohi ba ka party kaba don 12 na ki 36 tylli ki seat ha ka thaiñ Khasi-Jaintia, mynta ka la sah sa 4. Bad na kine ki 4 ruh, ki dak ki pyni ba ka lah ban nang hiar sa tang 1,” u la bynrap.
Une u nongïalam uba la rim ha ka saiñpyrthei u la maham ba lah ban don shuh shuh ki MLA ki ban mih noh na ka party. Haba kylli lada don shuh ki MLA kiba lah ban leit sha kiwei pat ki party, u la ong, “Katkum ka jingtip kaba nga la ïoh, haduh mynta ngam pat ïohsngew ïa kano kano kum kata. Hynrei ki dak ki pyni ba don ki MLA kiba lah ban leit sha kiwei pat ki party.”
Haba kynthoh ïa ka jingkylla ka saiñpyrthei hapoh ka party, u la ong, “Kito kiba pynïaid ïa kata ka jingmut ki dei ban ïaid shuwa sha kawei ka thong. Hynrei lada kim pynïaid sha kawei ka thong bad ki ïaleh pyrshah ïa ki paralok jong ki hi, kan ym treikam.”
Halor ka jingkren ba u hi ruh u lah ban leit ïasoh bad ka BJP, u bah Paul u la ong ba u dang pan jingmynjur na ki nongkyrshan bad ki paid jong ka constituency jong u.
“Ym donkam ban don ki jingkynnoh ne ki jingmutdur. Hynrei kum u nongïalam bad MLA uba la jied da ki paidbah, nga mynta nga don ha ka bynta ban ïasyllok bad pan jingmut na ki nongkyrshan jong ka UDP West Shillong constituency, namar kine ki jingjia ki la poi sha ka bynta ba, kumba nga la ong, ka party ka lah ban sah sa tang 1 ne 2 ngut ki MLA. Kumta ngi hap ban shim ka rai shaphang kumno ngin ïaid nangne shaphrang,” u la ong.
Haba kylli lada un dang sah bad ka UDP, u la ong, “Nga dang ong ha phi mynta ba ka jingïasyllok ka dang ïaid. Kan shim por namar ngi dang sngap ïa ki jingmut na baroh ki nongïalam bad ki nongtrei kiba hakhmat jong ka party.”
U bah Paul u la ong ba ka jingmih noh jong ki MLA na ka UDP ka la long kaba lah ban jia.
“Ym don jingkyndit ei ei. Namar la shisnem mynta ngi la ïohi ïa ki dak jong ka jingïapher jingmut. Manla ka por ba ngi ai jingmut ne ngi kren, ki ong ba ym don ei ei kum kata, bad ki kylli balei ngi wanrah ïa kum kane ka phang ban ïakren. Kaba mut ba kane ka la dei ban jia, bad ka la long kaba ym lah ban lait,” u la ong.