Ka UCC kan ap jingma ne em ïa ngi?

Ha Ka por ba wan ka BJP ha ka bor ka la buh ïa lai tylli ki thong (manifesto election) kiba kongsan kiba long phylla bad khyllah bha (controversial) ba ka thmu ban pyndep bad kita ki dei:
1. Ka jingpynduh ïa ka Article 370 / Scrapping of Article 370 (in Jammu and Kashmir)
2. Ka Ram Mandir
3. Ka Uniform Civil Code.
Lada ngi peit ïa kitei ki artylli ki phang haneng mynta ka la ïaid shakhmat ban pyntreikam bad ban pyndep ïa ka thong. Ka ba dangsah mynta ka dei ka Uniform Civil Code (UCC), ïa kane ruh ki la sdang ban ïaid lynti shakhmat bha ban wanrah ha ka parliament lyngba ka jingbtah jong ka sorkar ïa ka aiñ Law commission ban shim ïa ka jingai jingmut jong ki briew ne ki group na baroh ki ba shong hapoh ka ri naduh ka 14 tarik u jylliew haduh 14 naitung bad la pynai por shuh haduh ka 28 tarik u naitung 2023.
Ha ki kyntien basuk tam (simple words) ban sngewthuh shaphang kane ka Uniform Civil Code (UCC) ka long ban sngewthuh bha shwa ïa kitei ki kyntien ki mut aiu.
Uniform(U): Kawei/Kajuh/Salonsar
Civil(C): Marwei/Ka iïng ka sem (Personal)
Code(C): Ki Aiñ.
Kamut ba ngin don noh tang kawei ka aiñ hapoh ka Ri lada ki lah ban pynlong aiñ ïa kane ka UCC naduh ka rukom ïashong kurim(marriage), ka jingïapyllait sanshyieng(divorse), ka jingtingkhun(Adoption), ka jait ka kur sha u kpa, ka jing hiar pateng ka spah ka phew(Succession) bad kumta ter ter. Namar haduh mynta ngi dang don la ki jong ki jong ki aiñ ki dustur la ha ka jaitbynriew bad ka niam hi ruh. Lada ngi peit hapoh ka ri India jong ngi ngi don kumba 4 tylli kita ki aiñ lajong (personal law), kita ki dei
1. Na ka bynta ki Hindu, Buddists, Jains bad Sikhs ki don ïa kata ka The Hindu Marriage Act, 1955
2. Ki Muslim ki don kata ka Muslim Personal Laws, 1937
3. Ki kristan ki don kata ka The Indian Christian Marriage Act, 1872
4. Ki Parsi ki don ka Parsi Marriage and divorce act, 1936
Te mynta ioh lehse ka jingkylli kan mih hangne,
Balei ka sorkar ka thrang ban wanrah ïa kane ka UCC?
Ki don ki katto katne ki phang (points) ba ngi hap ban tip ba balei ka thrang ban pynlong aiñ ïa kane ka UCC.
1. Kumba la kren naduh ba sdang ba satang ka UCC ka phang ba kongsan (main) ba ka BJP kam pat lah ban pyndep kumba ki la buh ha ka mat treikam lane ka manifest jong ki.
2. Ki wanrah ïa kane ha kata ka nongrim ba ka bha ban don kawei ka Ri kawei ka Aiñ (one nation one law).
3. Namar ki don katto kattne ki case jong ki kam ïing kam sem (Personal) ba ka iïngbishar lane ka judiciary ka ïakynduh na ka por sha ka por bad ka long ba shitom ban ai jingbishar ne judgement ne ki rule out namar ba ki kam ïing kam sem ki hap ruh ha ka Fundamental rights jong ngi, te ka ai jingmut ne suggestions ïa ka sorkar ban pynlong aiñ noh ïa kane ka UCC.
4. Ka UCC ka dang don ha ka thup, Concurrent list ha ka 7th Schedule jong ka riti treikam (Constitution) jong ka Ri India jong ngi. Kane ka mut ba ka long kum ka jingaijingmut lane suggestion ïa ka sorkar ba lada donkam ki lah ban pynlong aiñ ïa ka, tangba kin hap shim ïa ka rai ki paidbah jong ka ri. Te ngi la ïohi ruh ba la thaw ïa ka Law Commission ba 22 ban leh ïa kane ka kam.
Te lada ngi lah sngewthuh ïa ka UCC, te ka jingkylli ngin lah ban don
Kan ktah ne em ïa ka jaitbynriew jong ngi?
Haoid lada kheiñ ba kin pynlong aiñ ia kane te kan treikam ha baroh ka ri tangba ngi hap pat ha ka 6th Schedule. Ka jinghap jong ngi ha ka 6th schedule ka mut aiu??
Ka mut ba ka constitution ka pynkupbor ïa ngi ban thep ïa ki aiñ ki kanun da ngi ïa ngi hi lyngba ki district council ba ngi don. ka JHADC bad ka KHADC ki la dep pass da ka resolution ba pyrshah ïa ka UCC. Te kane ka pyni ba lada ki pynlong aiñ ïa ka ruh kan ym treikam hapoh ka state jong ngi.
Sa kawei ruh ka jingkren jong u myntri ki kam pohïing ka ri u Amit Shah u la dep ong ba ïa ki kristan bad tribal yn ym pynhap ha ka UCC.
Te mynta kan shong ha ki nong thaw aiñ jong ngi kin nang ban pyndonkam ïa ka ta ka bor ba ki ioh lyngba ka 6th schedule jong ka riti treikam ka Ri jong ngi ban thaw ïa ki aiñ ki ban ïada lada ka sorkar BJP ka lah ban pynurlong ïa kane ka UCC.