Ka tnad PWD kadei ka tnad treikam jong ka sorkar kaba peit na ka bynta ban shna bad moramot bad na ka bynta ka jingbit jingbiang jong ki surok ha ka jylla. Kumta kadei kawei na ki tnad kiba donkam bha bad kan hap ban dei ruh ka tnad kaba hap ban mang bun eh ka pisa na ka baroh ki tnad treikam jong ka sorkar. Ka daw ka long ba kumba ju ïa ong baroh ba ka surok kadei u thied snam jong ka jylla, la ka long ha ka roi ka par, ka leit ka wan, ka kit ka bah bad kiwei kiwei de ki bynta jong ka jingim briew ba man ka sngi.
Hynrei haba peit ïa ka jingtreikam ka tnad PWD ha kine ki sngi ba mynta, lah ban ong ba ka la pheil ha ka jingtreikam jong ka. Ka daw ka long kaba baroh ki paidbah ki ong bad ki ïohi da la ki jong ki khmat ïa ka jingjot jingpei ha kylleng ki jaka. Kaei kaba lyngngoh ka long ba wat ha ki jaka sor ruh bun ki jaka kidei kiba la jot la pei. Kam ju kham jia koit ba ki surok kin jot ha nongbah Shillong, hynrei dei tang ha kine ki snem baladep, namar mynshuwa da jot ki surok ha nongkyndong ha sor te ki bha beit.
Ha kine ki sngi kiba ladep, la ïohi ïa ka jingïakhih ki paidbah ha East Jaiñtia Hills District namar ka jingsniew palat ka surik NH-06, kaba dei ban ïaid na Khliehriat shaduh shabar ka jylla Meghalaya ban pynïasoh bad kiwei pat ki jylla ka thaiñ shatei lammihngi, kum ka Mizoram, Tripura bad kiwei kiwei de ki jylla. Wat lada kane ka surok ka hap hap hapoh ka jingpeit ka National Highway Authority of India (NHAI) hynrei ka tnad PWD jong ka sorkar jylla pat kam lah ban shu thet kti ba kam don bynta eiei, namar ba kadei ka surok kaba ïaid na ka jylla Meghalaya. Ïa kane ka surok wat ka High Court of Meghalaya ruh ka la tuklar na ka por sha ka por hadien ka jingujor PIL uwei u Samla rangbah na East Jaiñtia Hills. Ka jingleh mynthi ka NHAI lehse kadei namar ba ka PWD jong ka Meghalaya kam i patiaw eiei bad la hao ban ïakhun pynban da ki Sengbhalang, ki bor Shnong bad ki paidbah ka East Jaiñtia Hills na ka bynta kane ka surok ha ka jaka ban ïakhun ka PWD bad ka NHAI.
Kaei kaba kaba la jia ha ka sien ïakhih kaba khatduh eh na ka bynta kane ka surok, ba la pynlong da ka KSU, ka la long ka jinglehraiñ kaba khraw ïa ka jylla, ha kaba ki paidbah kila pynïaryngkat dor ïa kane ka surok kum ka pynthor kba da kaba pynlong ka jingïathug kba pharshiu hapdeng surok. Nangta ki la pynïaryngkat dor ruh bad ka pung dohkha da kaba pynlong ka jingïakhwai pharshi hapdeng surok. La ïohi ba wat ki Pulit na Mizoram kaba long ka jylla kaba hap ïaid na kane ka surok, ki la ïashim bynta ha kane ka jingïakhwai pharshi.
Dang mynta ka sngi pat sa ki nongkhwai bad ki nongïalam bad dkhot ka HYC Diengiei bad Khrang Circle ki la lap sa ïa ka rukom siang rong kaba torti ha ka surok kaba ïaid na Mawmaram lyngba ka Nongthliew, Diengiei shaduh Lad Umsaw, kaba ka jingthmu jong kane ka surok ka long ban pyllait ïa ki paidbah kiba leit sha Ribhoi ban nym donkam shuh ban iaid na Upper Shillong ban lait na ka jingsahkut kali. Hynrei ka jingsiang ïa kane ka surok ka pyni shair kdar ba kadei kaba la shu siang tang dep, ha kaba wat ïaka rong kaba la siang bad tylliat da ka roller ruh dang lah ban khyllie tang da ka kti.
Kaba kum kane ka rukom siang rong kam dei kaba jia tang ha kane ka surok, hynrei kadei kaba jia kylleng kylleng ki jaka ha ka jylla, ha kaba lah ban ïohi ruh ha ka jingsiang rong sha ki thaiñ Amlarem dang shen ka la mih ha ki lad pathai khubor ïa ka jingsiang rong kaba torti kaba la shu siang tang ban dep.
Kine kidei ki jingjia kiba pynlong ba ka tnad PWD ka la pheil ha ka jingtreikam jong ka, ha kaba ki surok kim ju neh hynrei tang shipor ne tang katto katn snem ki jot ki pra noh. Kaba mih na kane ka long ba ki paidbah ki mad ïa ki jingeh bad ki hap ban shah ïa ki jingjynjar. Kiba bun tylli shnong ki dawa na ki bor sorkar khamtam na ka tnad PWD ban moramot noh ïa ka surok ha ki shnong ne ki thaiñ jong ki, hynrei ka jubab kaba ki ïoh na ki Engineer ka PWD ka long ba ym don fund ne ym don pisa.
Ka sorkar hapoh ka jingïalam ka NPP ka kam ba ka la leh shibun ki kam bad kham palat ban ïa kaba leh kiweipat ki sorkar ha kine ki sanphew snem, hynrei balei pat kat shaba phai shu ïoh sngew beit ïa ka jingud jingnam ki paidbah ym tang ha kaba ïadei bad ki surok, hynrei haduh ka bording elektrik, ka umbam umdih, ki jaka sumar, ka pule puthi. Imat kane ka sorkar ka la shu trei tang ban pynhun ïa uwei arngut tang bad tang ban biang kiba don ha ka bor.
