Ai mynsiem u Addl SP ïa ka EJHCA ba kwah kyntiew ïa ki khynnah donsap ban ïalehkai Cricket

By Mawphor News Desk On Oct 3, 2023

Khliehriat, Risaw 02 : Ka East Jaiñtia Hills Criket Association, ka la pynlong ïa ka jingialang ba kyrpang mynta ka sngi ha East Site Inn Hotel, ha kane ka jingïalang la pynpaw ïa ki jingthmu ba ka Association ka don ban kyntiew ïa ki khynnah kiba don ka sap ba ialehkai criket, u Addl Superintendent Of Police East Jaiñtia Hills District, u bah Banraplang Jyrwa, MCS, haba kren kum u kongsan u la ai mynsiem ïa ki nongïalam ka Association ba kin nang kiew shaphang ha kaba kyntiew ïa kane ka kam ialehkai criket ban wanrah bad kyntiew ruh khamatm ïa ki khynnah kiba don ka sap ban ialehkai.
U bah Banraplang Jyrwa, u la pynpaw ruh ka jingsngew kmen ban sngew ba ka Association ka la lah ban kyntiew ïa uwei u khynnah samla uba na ka shnong Sohkymphor, u samla Kishan Lyngdoh uba la lah ban im kamai bad pyndap ïa ka ïing ka sem da kaba ialehkai criket.
Ha kaba ïadei ban ka jingthmu ka Assocaition kaba yn sa pynlong ïa ka fete ban pynmih pisa, u kongsan u la ong ba “kano kano ka kam ka dei nyngkong eh ka jingthmu kaba kongsan, namar bunsien ki briew ki ju pyrkhat ba kane ka dei tang ka Fete, hynrei ka don pat ka jingthmu kaba phi thmu ka long na ka bynta ban kyntiew ïa ki khynnah kiba don sap ban ialehkai criket” u la ong ruh ba bunsiem ki khynnah ki tip tang ïa jingialehkai football, hynrei donkam ba kin tip ïa ka criket ruh namar ha kiwei kiwei ki jaka ki khynnah naduh dang rit ki sngewtynnad ïa ka criket namar ha India hi ka jingialehkai criket ka dei kaba la sdang naduh mynshwa eh bad ka la don ka nongrim kaba kham khlaiñ bha ban ïa ka jingialehkai football “ngi iohi ruh ba ki nongialehkai criket khamtam kito kiba la poi sha ki kyrdan ba shalor, ka jingkamai jong ki ruh ka la kham heh, khmih lynti ba da kane ka jingshim khia ka East Jaiñtia Hills Criket Association kan ïarap ban kyntiew ïa ki khynnah jong ka district kiba don ka sap ban ialehkai criket namar kum ka Association phi la ialehshitom, phi la ioh ruh ïa ka madan kaba biang, ngi ruh na ka liang ka tnat pulit ngin iarap lang ha kano kano ka jingdonkam, khamtam ha kaba pyndie lem ïa kine ki tiket khalai nusip”
Utei u heh pulit, u la pynpaw ruh ka jingsngew khia namar ka jingngop ki khynnah ha u drok, u la ong ba ka tnat pulit ka la shim khia haduh katta katta ban rat dyngkhong ïa u drok khnang ba ki khynnah ba ki samla kin lait na u drok bad kawei na ki lad ban iarap ïa ki khynnah ban lait na u drok bad na kino kino ki jingnsiew ka long ban ialeh ban wanrah ïa ki khynnah bad ki samla sha ki lympung jingialehkai, namar lada ki sngewtynnad ban ialehkai kin lait na ki jingsniew ba bun jait, haba kren shapang u samla Kishan Lyngdoh utei u heh pulit u la ong ba ki briew jong ngi kim dei kiba duna ha ka sap ka phong, hynrei ki donkam ban ioh ïa ki jingialam bad ki jinghikai kiba biang, ki jaka ba ai jinghikai kiba paka, u la ai ka jingkitbok kitrwiang ruh ïa ka Association ba lyngba kane ka fete kaba kin sa pynlong, kin ioh bha ïa ka kamai ban kyntiew ïa ki khynnah jong ka district.
U Secretary jong ka East Jaiñtia Hills Criket Association, u bah Tnebha Phawa, Tnebha, u la pynshai ïa ka jingthmu jong ka Association kaba tmu ban pynlong ïa ka fete bad ka jingpynkhailai nusip (lucky draw) bad ong ba “Kane ka fete ka long ban pynmih pisa, ngi don ka jingthmu ba bha ban kyntiew ïa ka jingialehkai criket, namar don bun ki jingdonkam kiba ngi dang hap ban pynbiang kum ki bat, ki ball, ki gloves bad shibun ki tiar ba donkam haba ialehkai criket kiba ïada ruh ïa ka met, kiba rem dor, ngi la iohi ba ki don bun ki khynnah kiba don ka sap ban ialehkai, kumta ngi la mih shakhmat ban wad ïa ki lad ki lynti na ka bynta ban kyntiew ïa ki, hooid ngin sa ioh ïa ki jingiarap na ka sorkar bad kan dang shim por bha ban ioh, kumta ban pynurlong ïa kane ka jingthmu ba bha, ka Association ka la thmu ban pynlong noh da ka fete ban kamai pisa ban ioh lad ban pynbit pynbiang ïa ki jingdonkam jong ki khynnah kiba ialehkai criket, namar ioh kan palat noh ka kyrta jong ki pynban”
U bah Phawa, u la iathuh ruh ïa ka jinglah ka Association ban kyntiew ïa uwei u samla uba na East Jaiñtia Hills District, u samla Kishan Lyngdoh, uba na ka shnong Sohkymphor, uba la im kamai da kaba ialehkai criket, u la lah ban pyndap ïa ka ïing ka sem bad iarap ïa ka kmie bad ïa ki para ha ïing ha sem da kaba kamai na kaba ialehkai criket, la ong ba une u samla Kisan Lyngdoh u la iashim bynta ha kiba bun ki rynsan ialehkai criket, ki tournament, ki Trophy bapher bapher kum ka Duleep Trophy, ka Ranji Trophy, ka Vijay Hazare Trophy bad ka Syed Mushtaq Ali Trophy, tang na kine ki trophy utei u samla u la kamai da ki phew lak tyngka, ym duna ïa ka 20 lak tyngka ha ka shi snem, kumta utei u nongialam jong ka Association u la kyntu ïa kiwei kiwei ki samla don sap ruh ba kin shim nuksa na une u samla Kisan Lyngdoh ban mih shakhmat ban pynpaw ïa ka sap ba ki don.
H a kane ka sngi, u Addl. S.P, u la pyllait paidbah ruh ïa ki tiket khalai nusip bad ïa ka kali (Jeep) Thar kaba ka Association ka pynkhalai nusip ha ka fete kaba yn sa pynlong ha u bnai naiwieng 2023.
Kiba la ai jingkren ha ka jingialang ki kynthup u President EJHCA, u bah Rajiv Bareh bad ïa ka jingialang la pyniaid da u Vice President EJHCA, u bah Mehiwot Shadap.