Ka syrngiew jingjaboh ka Byrnihat, sa katno ki paidbah kin lynñiar bad im sohsat hapdeng ka jingdum tliw tliw

Banroi Syiem, Correspondent Ri-Bhoi District

Nongpoh, K’Lyngkot 29: Ka Byrnihat kaba la ju tip kum kawei na ki jaka khaii ba heh bad thnem ha ka them Ri-Bhoi, ka long kawei na ki jaka kaba ki paidbah ki bunkam ban mareh ban kamai kajih, bad kadei ruh kawei na ki jaka ba bun bha ki karkhana, ka la ïoh nam kum kawei na ki shnong ba jaboh tam ha ka ri India katkum ka kaiphod jong ka Centre for Research on Energy and Clean Air bad katkum ka Air Quality Index ka lyer ha ka thaiñ Byrnihat mynta ka la nang jaboh bad don jingma ïaki paidbah ba shong ba sah ha katei ka jaka namar ka tdem kaba mih na ki karkhana ka la nang shyrkhei bad pynlong ïa ka thaiñ Byrnihat hi baroh kawei ban dum lynter kumba long ka nongbah Delhi.
U nongthoh khubor jong u Mawphor u la hiar sha katei ka jaka ban lap ïa ka jingeh bad kumno ki paidbah ki im hapdeng ka jingeh kaba khraw na ka jingjaboh naduh ka lyer haduh ka um, bad la sakhi ruh ba ka jingjaboh ka la long kaba shyrkhei ha kaba ki tdem pui pui ki hap sha ki iing ki sem jong ki briew kumba hap ka ior bad lah ruh ban sakhi ba ki jingthung jingtep la sop da ki tdem kiba iong ngaiñ ngaiñ bad kiba bitnah, ba wat ki jhur ki jhep ki ïap stai bad kim don dor ha iew ha hat.
Ka jing kiew jong ki karkhana ha ka thaiñ Byrnihat ka la ktah shi katdei ïaki paidbah khamtam ki paidbah nongshong shnong jong ki shnong ba don marjan bad kitei ki karkhana kum ka Dehal Bagan, Harli Bagan, Nongkyrla Mikir bad ka thaiñ Byrnihat hi baroh kawei ha kaba ki iing ki sem, ki jingthung jingtep, ki madan madiah la sop da ki tdem iong bad katno ka long ka jingma ïaki paidbah kiba im bad ring mynsiem man ka sngi ha katei ka jaka bad dang ha kine ki khyndiat sngi ka la pynbor ruh ïaki paidbah katei ka thaiñ ban mih sha surok ban pyrshah bad pyrta shla halor ka jingkhlem akor jong ki karkhana ban dawa ruh na ka sorkar ba ka dei ban peit bñiah bad ban pynlong ka jingtohkit bad tehlakam ïa kitei ki karkhana.
U nongthoh khubor u la ïoh ruh ban ïakren bad ki nongrep ha katei ka thaiñ kiba pynpaw ka jingeh ba ki ïakynduh man ka sngi ha ka jingim jong ki, ha kaba kim nud shuh wat tang ban pynmih bad pynïalehkai ïaki khun shabar namar ka jingjaboh bad satah da ki pum pum ba iong ngaiñ ba her na ki karkhana, bad katno ka long shisha ka jingma ïa ka koit ka khiah jong ki paidbah kiba shong ba sah bad im man ka sngi bad bun na ki paidbah ki ïoh ki jingshitom bapher bapher kum ka bampong, ka jingeh ban ring bad pynhiar mynsiem nalor kiwei kiwei.
Kum ban shu kdew hangne ba kat kane ka jingjaboh kam pat ju wan jia ha kine ki snem bala leit noh ha kaba Ki nongrep kwai, nongrep jhur, tympew mynta ki don hapdeng ka sohsat bad ka jingïam kthang kaba khraw namar ki jhur ki jhep bad u kwai u tympew kim don dor shuh ha iew ha hat bad kim long shuh ban thung ban tep.
“Ngi don hapdeng ka sohsat kaba khraw wat ban kheit ïaki kwai ki tympew namar tang ban sait ruh lah jynjar, ba wat ki nongtrei ruh ki la kyntait ban kheit bad sait ïaki kwai ki tympew ba thmu ban die sha iew” la ong kawei ka longkmie kaba im da kaba die kwai bad tympew ha katei ka thaiñ.
Naduh ki khynnah skul kiba ju leit skul man ka sngi khamtam ka skul Don Bosco Higher Secondary School, kaba don ha syndah kitei ki karkhana ki la ud la nam ha kaba ki la don ruh kiba shem jingeh wat ban ring mynsiem bad bunsien haba ki wan mynstep ki hap ban ñiat bad pynkhuid shuwa ïaki ben skul, ban sar ïaki kamra kiba rben da ki pum pum namar ka jingjaboh bad wat ki nonghikai ki pynpaw ka juh ka jingeh.
Katto katne ki riew paidbah bad ki nongïalam shnong ki la pynpaw ka jingsngewkhia kaba jur bad buh jingkylli ruh balei ka sorkar kam leh eiei ïa kitei ki karkhana kiba pynmih ïaki tdem ba shyrkhei, namar wat tang ban thad jaiñ habar ruh kim nud shuh na ka jingher jong ki tdem iong bad sngewkhia ba kin nym im slem ha kane ka pyrthei lada katei ka tdem bad jaboh ka dang bteng ban mih na kitei ki karkhana.
Lah ruh ban kdew hangne ba ka lyer jaboh kaba mih ha ka thaiñ Byrnihat kam dei tang na ki karkhana ka jylla Meghalaya hynrei wat ki karkhana na ka jylla Assam namar ka thaiñ Byrnihat ka don ha khappud ka jylla Assam bad shibun ki karkhana wat na ka jylla Assam ki don ha katei ka thaiñ.
Shuh shuh halor katei ka jingïoh nam ka Byrnihat kum ka jaka ba jaboh tam ha ri India, u nongthoh khubor u la ïoh ruh ban ïakren bad u MLA ka Jirang Constituency u Bah Sosthenes Sohtun ha kaba u la pynpaw ba kum u MLA um shym la sngap namar u shong u sah ha katei ka jaka bad mad kajuh ka jingeh ha kaba u la ïoh ruh ban ïakren bad u Myntri Rangbah ka jylla ban pynpaw ïa katei ka jingeh ki paidbah bad u la buhr uh ka jingkyrpad sha ka sorkar bad ka tnad Pollution ka jylla ba ka dei ban shimkhia mardor ïa katei ka jingeh jong ki paidbah nongshong shnong katei ka thaiñ khamtam ban tehlakam ne ban khang syndon ïaki karkhana ki bym bud ïaki kyndon.
Haba buddien ïa katei ka jingeh jong ki paidbah, la ïoh ruh ban ïakren bad u Deputy Commissioner ka Ri-Bhoi District u Abhilash Baranwal, uba la pyntip ba ka thaiñ Byrnihat ka la shah jied ban rung ha ka National Clean Air Programme, bad kumba long mynta ka la don ruh ka jingwad bñiah ïa ka jaka mih jong ka tdem bad la bthah ruh ïa ka tnad MSPCB ban pynlong ka jing jurip ba man ka por bad ka MSPCB ka dei ruh ban ai jingtip ïa kito ki karkhana kiba pynkheiñ aiñ khnang ba ka bor district ki lah ban khang khyrdep bad ban pynngat ha ki kyndon jong ka aiñ.
Namarkata ka Byrnihat ka la donkam ïa ka jingkylla bad na ka liang ka sorkar lyngba ka tnad MSPCB kam dei ban shu shong kli kti ban sngap man man ïa ka jingeh jong ki paidbah hynrei ban leh eiei ïa kitei ki karkhana ki bym burom ïa ka jingeh jong ki paidbah, namar ban shu im sah ha ka jingjaboh naduh ki wah, ka lyer bad ka um kan long ka jingtim ïaki paidbah ba shong ba sah ha katei ka thaiñ, kumba ki la pynpaw ba ka jingim jong ki ka long kaba lyngkot hapdeng ki jingpang jingshitom ba bun jait ba ki lah ban ïoh na ka jinglong jong ka mariang.
Ïa kane ka khubor shen yn sa pynlait ruh ha Youtube jong u Mawphor ban ïohi lyngba ka Video ïa ka jingeh kaba ki paidbah ki ïakynduh ha katei ka thaiñ na ka daw ka jingjaboh bad ki pum pum ba mih na ki karkhana.