Jop ka Elite XI bad ka Shillong Sixer ha ka SCA Cricket League Third Division 2024-25

Shillong, Kyllalyngkot 30: Ki ar tylli ki jingïalehkai ka lympung Shillong Cricket League Third Division 2024-25 ba la pynïaid da ka Shillong Cricket Association ha madan Urkaliar, Shillong, ha ka sngi Palei ki la jam sha kaba kut ha kaba ka Elite XI bad ka Shillong Sixer ki la khur ïa ka jingjop. Ka Elite XI ka la pynliem ïa ka Blaze Brigade da 6 wiket, katba ka Shillong Sixer ka la jop da 6 ron ïa ka SCA A.
Haba phai sha ka jingïalehkai kaba nyngkong, ka Blaze Brigade ka la jop ïa ka toss bad shimti ban tied nyngkong, ha kaba ka la lah ban kynjoh 150 ron bad hap baroh 10 wiket naki 20 over ba la mang. Kiba la kyrshan ïa ka kynhun ban kamai kham bun ron ki long u Amar Chaudhary (36 ron naki 33 bol) bad u Poimi jjs Pasi (18 ron naki 17 bol).
U Balaji (4 over: shah tied 15 ron) bad u Jetu Daimary (4 over: shah tied 21 ron) jong ka Elite XI ki la ïoh ban khur mar 2 wiket ha ka bol.
Haba beh ïa ka thong ka Elite XI ka la shimpor tang 14.5 over ban kamai 151 ron da kaba hap tang 4 ngut ki nongtied. U Wanaibok (3.5 over: shah tied 27 ron) bad u Hilarious Khomglah (3 over: shah tied 29 ron) ki la ïoh ban khur mar 1 wiket.
Ka jingïaroh ka long sha u Ujjal Singh uba la khyrwit haduh 79 ron naki 39 bol kaba la kyrshan borbah ïa ka Elite XI ban jop da 6 wiket bad ban khur syndon ïa ka khusnam ‘Player of the Match’, katba u paralok, u Shubham Thakur u la lah ban kamai 35 ron naki 22 bol.
Haba phai pat sha ka jingïalehkai kaba ar, ka SCA A ka la rai ban bol nyngkong hadien ba jop ïa ka toss, bad haba shimti ïa ka pali tied ka Shillong Sixer ka la lah ban kamai 160 ron haduh kaba kut jong ka 20 over ba la mang bad hap 4 wiket.
U Fernando Bareh u la long uba tyngshaiñ tam ha ka tied, ha kaba u la duna noh tang 9 ron ban kynjoh ïa ka spah ron (century), kata ban tied 91 ron naki 57 bol, katba u Amir Shiekh u la kyrshan da kaba kamai 29 ron naki 23 bol. Napdeng ki rangkawangbol ka liang pyrshah kiba la seisoh ki long u Sagar Solanki (4 over: shah tied 33 ron: khur 2 wiket) bad u Amul Kumar (4 over: shah tied 30 ron: khur 1 wiket).
Haba pyrshang beh ïa ka thong ka SCA A ka la ïohlad ban kynjoh duna, kata da 154 ron haduh kaba kut jong ka 20 over bad hap noh 3 wiket. Watla u Sameer Choudhary (44 ron naki 34 bol) bad u Prince Ray (28 ron naki 16 bol) ki la trei shitom hynrei ha kaba kut jong ka 20 over ka kynhun ka dang sahdien sa 6 ron.
U Sumeet Gurung u la ïoh ban khur 2 wiket naki 4 over bad shah tied 16 ron, katba u Sandeep Roy u la khur 1 wiket naki 4 over bad shah tied 22 ron. ïa ka nam ‘Player of the match’ la khur da u Fernando Bareh u ba la kamai 91 ron naki 57 bol.