Khliehriat, Naitung, 09: Namar ka jinglong jingman jong ka surok National Highway-6 ha ka thaiñ Narpuh East Jaiñtia Hills District kaba la sniew shaba palat bad kaba buh jingma ïa ki nongleit nongwan bad kaba wanrah ruh ïa ka jingdheng kali kaba khah khah ha ka thaiñ, ka Khasi Students Union (KSU) Narpuh Circle ka la pyntip ba ka seng kan sa khot lang ïa baroh ki Waheh Shnong jong ka thaiñ ban ïakren kyrpang halor ka jinglong jingman jong ka surok bad yn sa shim ruh ïa ka rai kumno yn leh halor kane ka jingeh ba ki paidbah ki ju ïakynduh na ka por sha ka por.
Ha u kyrwoh ba la phah da u General Secretary ka KSU Narpuh Circle u samla S.Bamon, la ong “ka jingjulor bad jingsniew palat jong ka surok National Highway ha ka thaiñ Narpuh ka la pynklumar jingmut hi thlim ïa baroh ki nongñiah kali kiba dei ïaid lyngba na kane ka surok namarba kane ka surok ka dei ruh ka surok kaba ju ïaid lyngba ki kali kiba na ki jylla kiba nabar ruh kaba pyniasoh bad ka jylla Assam, Manipur, Mizoram, Tripura bad kiwei kiwei ki jylla.”
Ka seng ka la kynnoh, “lyngba kane ka surok la ithuh shai ba ka jingbam sap jong ki nongsynshar ri ka jur bha haduh ba kim lait ang shuh ban kren eiei ha khmat ka NHAI. Katno ka long ka jinglehraiñ kaba khraw ïa ka jylla. Namarba kane ka surok ha baroh shilynter ka la long kum ki pung ri dohkha bad tang hapoh ka 1 kilo mitar la ju lap ba ki la don haduh lai bad saw tylli ki kali kiba sniew na ka daw ka jinglong jingman ka surok bad kat nang mih ki sngi ka surok ka la nang julor bad nang julor.”
“Sngewsammut pat ban pyrkhat ba ka Sorkar ka kwah lynti Rel haba tang ïa kane ka surok kaba la don lypa ruh kam lah ban leh eiei, ka phohsniew pynban sha ïa ka lynti Rel, kumta shwa ban shim ka rai, ka seng kan khot ban ïamir jingmut lang bad ki riewpawkhmat lem bad ki Waheh Shnong ka thaiñ Narpuh,” pynkut u kyrwoh.
