Shillong, Nailur 23: Ka kynhun ïalehkai jong ka Shillong Lajong FC ha ka Lah Sngi U Blei [23 tarik Nailur, 2024] ka la pynbna ba ka la ïateh soskular bad ka Star Cement, kawei na ki karkhana cement ba paw ha ka thaiñ shatei lammihngi jong ka ri India (Northeast India).
Lyngba kane ka jingïatehlok, ka Star Cement kan long ka nongbei tyngka kaba hakhmat (official sponsor) jong ka klob Shillong Lajong, ka ban kyrshan ïa ka klob ban pyntyllun ïa ki jingthmu bad ki prokram kyntiew phutbol jong ka klob, naduh ki khynnah bad samla, kumjuh ruh bad ki kam ban pynïadei bad ki paidbah.
Haba ai jingkren ha ka jingïalang, u Pradeep Purohit – COO jong ka Star Cement u la ong “Ngi sngew sarong ban ïatreilang bad ka Shillong Lajong FC bad Ngi khmihlynti ban wanrah shuh shuh ki jingkylla ryngkatlang, da kaba ïatylli, ban pynshlur, bad ban wanrah ka jingkylla kaba kit jingmut ha ka imlang ka sahlang ha kane ka thaiñ lyngba kane ka jingïalehkai kaba sngewtynnat.”
U Nabarun Chatterjee, Head of Sales ha ka Star Cement, u la pynpaw, “Ka jingïatehlok jong Ngi bad ka Shillong Lajong ka long ka dak ba Ngi la shim ban pynïajan bad pynïadei bad ka Jaidbynriew kane ka thaiñ. Ngi khmihlynti ban kyrshan ïa ki jingthmu ki ban kyntiew ïa ka phutbol bad ban pynshlur ïa ka pateng ban wan jong ki khynnah ïalehkai ha kane ka thaiñ jong Ngi.”
Na ka liang jong u Dibyajyoti Guha, Head of Brand jong ka Star Cement, u la bynrap, “Ka jingïatreilang bad ka Shillong Lajong ka long ka kabu ba kongsan ïa ka Star Cement. Ka jinglong bad rukom treikam jong ki ka ïadei dur bha bad ka jingthmu jong Ngi ban kyrshan ïa ki samla bad ban kyntiew ïa ka“ka kolshor ha ka kam ïalehkai ha kane ka thaiñ. Ryngkatlang, Ngi khmih lynti ban ïatreilang ban pyntyllun ïa ki mat treikam kiba kit jingmut ryngkatlang bad ki nongkyrshan.”
Ha kaba ïadei bad kane, u Larsing LD Sawyan, Managing Director jong ka Shillong Lajong, u la pynpaw ïa ka jingsngewnguh ban ïoh ïatreilang bad kane ka kompeni kaba paw.
“Ngi dap da ka burom ban ïatehlok bad kawei na ki karkhana ba pawnam kum ka Star Cement. Ngi ngeit ba kane ka jingïatehlok kan ïarap ïa ka Lajong ban kyntiew shaphrang ïa ka phutbol ha Meghalaya bad kumjuh ruh na bynta ka thaiñ shatei lammihngi baroh kawei (Northeast region). Ka phutbol ha India ruh kan ïoh jingmyntoi.”
Khyndiat, ka Shillong Lajong Football Club kaba la seng ha u snem 1983, ka dei kawei na ki klob phutbol ba pawnam jong ka thaiñ shatei lam mihngi ka ri India, kaba na Shillong, Meghalaya. Ka klob ka don ïa ka histori kaba riewspah ha kaba ïadei bad ka jingkiew ka phutbol ha kane ka thaiñ bad ka la long ka atiar ban pynroi ïa ki sap ïalehkai ha kane ka thaiñ.
