Shillong, Nailar 02: Kumba la tip da baroh ba ka Meghalaya, kaba dei ka ïing jong ki katto katne ki shnong kiba jur slap tam ha ka pyrthei, la skhi ïa ka jingtyrkhong slap kaba ym thikna bha ha u bnai Naitung jong une u snem, ha kaba baroh ki district laitnoh ka South West Khasi Hills kiba la ïoh ka kaiphod kaba duna bha ka jinghab jong u slap, ong ka kaiphod jingkhieñ ba la pyni da ka IMD.
La ong ba 5 tylli na ki 11 tylli ki district jong ka jylla ki ïohpdiang slap tang kumba 50 haduh jan 80 per cent ka jingduna jong u slap ban ïa kaba ju long barabor ha utei u bnai, katba ka South West Khasi Hills kadei tang maka kaba la ïohpdiang marwei ïa ka jinghab slap kaba jur, kaba long 83 per cent ka jingbun u slap, kane ka long katkum ka jingkheiñ jong ka India Meteorological Department (IMD).
La ïathuh ruh ba wat ka East Khasi Hills district, kaba dei ka ïing jong ka shnong Sohra, kaba mynshwa la tip kum ka Cherrapunji, bad ka Mawsynram, ba la paw ha ka thup kyrteng kaba ïoh ka jinghab slap kaba la jan 50 per cent, ka la mad ïa ka jingtyrkhong ha kine ka thaiñ kiba la tip ha ka pyrthei ba ki dei ki shnong kiba jur slap ha kine ki por jong ka aïom slap mynta u snem.
Lah kdew ruh ba ka Sohra bad Mawsynram ki la dei napdeng kiwei pat ki shnong ha ka jylla kiba dei kiba jur slap tam ha ka pyrthei, hynrei ki mad ïa ka jingtyrkhong slap.
Shuh shuh ka district, kaba ju ïohpdiang slap kumba 2,796 mm ha u bnai Naitung barabor, hynrei mynta u snem ka la ïohpdiang tang kumba 1,403 mm, ong ka jingkheiñ na ka IMD ha kane ka kynti kaba mynta.
Nangta ka West Jaiñtia Hills ka la ïohpdiang ka jingduna hab slap kaba long kumba 78 per cent, ba la pynbud pat sad a ka West Garo Hills, kaba ïohpdiang slap tang kumba 339 mm na kaba ju ïohpdiang barabor kaba long 1,092 mm, kaba long duna kumba 69 per cent, pynpaw ka IMD.
La ïathuh ba ka East Garo Hills, Ri Bhoi, South Garo Hills bad South West Garo Hills ki dei napdeng ki district ba la shah ktah na ka jingïoh duna slap bha, katba ka West Khasi Hills, West Jaiñtia Hills, West Garo Hills, North Garo Hills bad East Jaiñtia Hills ki la hab hapoh ka kyrdan kaba duna slap bha jong u bnai Naitung.
Shuh shuh la ïathuh ba dei tang ka South West Khasi Hills marwei kaba ïohpdiang slap palat ïa kaba ju dei ban ïoh ha u bnai Naitung mynta u snem.
Lah ban ong ba ka jingslem ban ïoh ïa u slap uba jur ka la wanrah ka jingsngewkhia naba kane ka por ka dei ruh ka aïom thung ïa ki mar rep, ha kaba na ka liang ki riew shemphang ki la maham ba ka jingïai bteng jong ka jingdon ka aïom tyrkhong kan ktah ïa ka jingsei soh jong ka khyndew, ka jingdon ka um hapoh khyndew bad ka jingtuid jong ki wah ha kylleng jong ka jylla Meghalaya baroh kawei.
