Ka Sorkar Pdeng ka dei ban thaw da ki kyndon kiba shai kumno ban leh haba ïakhih ki Samla Pule : Dr .Ampareen

Shillong, Naitung 26 : Ka Chief Adviser jongka Sorkar MDA ba ïalam da ka NPP bad MLA jongka East Shillong Constituency ka Dr Ampareen Lyngdoh ha ka Sngi Saitjain ka pynpaw ka jingsngewkhia jur halor ka jingpur sted ka jingbitar ki khun samla ha kylleng ka ri bad halor kane ka kyntu ïa ka Sorkar Pdeng ban thaw da ki kyndon kumno ban leh haba jia kum kine ki jingïakhih jongki Samla Pule.
Haba ïakren bad ki nongthoh khubor ka la ong “ Nga da sngewsih bad sngewdiaw shisha halor kane ka jingjia kaba la pur sted kylleng ki bynta ka ri kaba la pynbitar da shisha ia ki khun samla”
“ Nga da sngewmong bad sngewkhia jur haduh katta katta ban ïohi ba kane ka jingduh jingkyrmen ka la rung sa sha kawei pat ka pateng ha kane ka ri ba ieit jong ngi kata ka ri India” ong ka Dr Ampareen.
Ha kaba ïadei bad ka jingïakhih ba dang shen jong ki samla pule ka la ong ki don bun ki lad ki lynti ban pyndonkam ïa ki aiñ namar ïa ki khun samla kiba kwah ban kren ïa ki jingshisha ym shym la ailad ïa ki bad la shu thom ïa ki ha kylleng ki jylla ka ri.
“ Nga ngeit skhem ba ngi donkam da ki kyndon kiba shai na ka Sorkar pdeng kumno ban leh haba kum kine ki jingïakhih jong ki Samla pule ki jia” ong ka Dr Ampareen.
Ka la ong ba ha ka ri synshar paidbah dei ban don kiba shim ïa ka jingkitkhlieh bad ha kane ka kynti ka jia ha u Myntri ka HRD Ministry namar kane ka kam lait tuh jingkylli ka hap hapoh ka tnad ba u dei peit.
Nalor kane ka Dr Ampareen ka la kyntu ruh ïa ka sorkar pdeng ban da bishar bniah ïa ka jingngiam ki jaka pule naduh kiba pynïaid da ka sorkar ne da ki kynhun ne ki riew shimet shwa ban pynïaid shakhmat ïa kino kino ki eksamin.
Ka la ong ba kane ka jingïai bakla shi ïai bakla na kawei ka por sha kawei ka ktah jur ïa ka jingshaniah jong ki samla pule ïa ki bor pynïaid.
“ Kine ki dei ki eksamin kiba donkam bha bad ka dei ka lawei jong ki samla pule bad kumta nga kwah ban ym ïohi shuh ïa kiba kum kine ki jingjia kin dang ïai jia biang hadien habud” ong biang ka Chief Adviser..
Ka la ai jingmut ba ïa kiba pynïaid ïa kine ki eksamin dei ban peitngor bha tangba ailad ba kin pynïaid laitluid pat ïa ka kam da ka jingkhuid jingsuba bad kaba shai kdar bad lada jia ba don ka jinglait tuh ki jingkylli ruh ki dei ban pdiang bad mynjur.
“ Kine ki tnad ba pynïaid kim dei ban ïoh leh katba mon donkam ban da peit thuh bha ïa ki bad dei ban pynthikna ba don kiba nabar kiba bud dien bad peitngor ïa ki khnang ban ym jia shuh kum kine ki jingjia. Ka Meghalaya ka la lait na kine ki jingïakhih dei namar ka jingshim khia kloi jong u Myntri Rangbah ka jylla bad ha ka jingstad jongu u la lah ban tem ban lait na kino kino ki jingkulmar” ong biang ka Dr Lyngdoh.