Amlarem, Naitung 26 : Ïa ka Meghalaya Teacher Eligibility Test (MTET), 2026 la pynlong ha ka sngi Thohdieng ha ka Syiem Jingsuk Higher Secondary School, Amlarem, hapoh ka Centre Code 31.
Ïa kane ka eksamin la pynlong hapoh ka jingpeit supervision jong ka kong Ladakahi Shullai, Associate Centre In-charge, ryngkat u Stephen Blah, Assistant Professor bad Centre In-charge. Dr. Kavery Rabha, MCS, Assistant Commissioner, Amlarem Civil Sub-Division, nalor ki nonghikai Ka Syiem Jingsuk Higher Secondary School kum ki nongpeitngor ban pynïaid beit ïaid ryntih ïaka eksamin.
Shuwa ban sdang ka eksamin, ka kong Ladakahi Shullai ka la batai lyngkot shapang ki rukom treikam bad ki jingbthah ba ki dei ban bud ryntih. La bthah ïa ki nongpeit ba kin pynrung thikna ïa ki Roll Number bad ki kot jingkylli jong ki bad kumno ban buh dak bha ïa ki jubab jong ki ha ki OMR Answer Sheets.
La bthah ïa ki nongthoh exam ban pyndonkam tang da u khulom ïong na ka bynta ban pyndap ïa ki kot jubab jong ka OMR. La pyntip ruh ba la khang tyngeh ban pyndonkam ïa ki mobile phone, ki smart watch bad kiwei kiwei ki tiar electronic hapoh ka hall eksamin.
La bthah ba ki dei ban aiti ïa ki OMR Answer Sheet shwa ban mih na ka jaka eksamin bad la maham ruh ba kim dei ban rah ïa ki kot jubab shabar jong ka jaka eksamin.
La bthah ruh ba ki dei ban rah lang ïa ka photo identity card kaba biang kum ka EPIC Card, ka Driving Licence, ka PAN Card, ka Aadhaar Card lane ka Passport.
Ka kong Ladakahi Shullai ka la ai ruh ka jingkitbok kitrwiang ïa baroh ki kyrtong kiba ïakhun ïa ka eksamin MTET 2026.
Na ka bynta ka Paper I, baroh kiba la thep kyrteng ki long 343 ngut, ha kaba 335 ngut kiba wan mih bad 8 ngut ki bym wan. Na ka bynta ka Paper II la pynrung kyrteng haduh 389 ngut, ha kaba 370 ngut ki la wan mih bad 19 ngut ki bym wan.
Baroh ki don 732 ngut kiba la pynrung kyrteng na ka bynta baroh ar tylli ki paper, ha kaba 705 ngut ki la wan mih bad 27 ngut kim shym la wan.
Ka eksamin MTET 2026 ha Amlarem centre ka la long kaba ïaid beit ïaid ryntih, katkum ki kyndon eksamin ba la buh.
