Ka sorkar MDA ka khlem bud dien thikna ïa ka ILP sha Delhi : Sawkmie

Shillong, Naiwieng 7 : Balei haduh mynta ka sorkar pdeng kam ai jingpynshai la kan ai ne em a ka Inner Line Permit (ILP) ïa ka jylla Meghalaya, kawei na ki daw bah ka long ba ka sorkar MDA ka khlem bud dien thikna ïa kane ka kam lait noh tang katto katne sien eh hadien ba la ai ïa ka Resolution sha ka sorkar pdeng, ong u bah P.T Sawkmie MLA jongka Mawlai Constituency.
“ Haka jingshisha la jan man la ka taiew bad bnai u Myntri Rangbah u Conrad K Sangma bad u Symbud Myntri Rangbah u bah Prestone Tynsong ki poi beit sha Delhi khru shi khru hynrei ym ju ïohi khubor ne kim ju ïathuh satia ba ki leit pynkynmaw ïa ka ILP. Lait noh tang hadien shisien ne arsien ba la dep ai ïa ka Resolution hadien kata la kynjah jar bad kam don ka jingbud dien kaba thikna. Dei na kane ka daw ka sorkar NDA ha Delhi ruh ka sngap jar bad ka buh sha kyndong ïa kane ka kam” ong u bah Process T Sawkmie.
“ Lada ka sorkar MDA kam shim khia imat sa tang ka sorkar thymmai ha u 2023 kaba lah ban pynurlong ïa kane ka ILP ha ka jylla bad lada ïoh ban ïalam lei lei ïa ka sorkar da ki Seng Riewlum kin shim khia ban bud dien namar ki sngewthuh ïa ka jingdonkam jongka ILP ban ïada ïa ki jaidbynriew trai ri trai muluk naka jingwan tuid kyrthlep jong ki mynder sha ka jylla” ong u bah Sawkmie.
U la ong “Ha ka jingshisha ka sorkar MDA ka la dei ban suk bha ban shu leit pynkynmaw sha Delhi kumba bud dien ïa ka Resolution ba la mynjur da ka ïing Dorbar Thawaiñ ka jylla hynrei ka khlem leh satia ïa kata na kata ka daw ki seng bhalang kim banse ban ïai ïakhih na ka por sha ka por ban ïai pynkynmaw ïa ka sorkar halor kane ka mat tangba imat wat la katta ruh kam don satia ka jingshimkhia namar dei na kata ka daw ba u symbud myntri rangbah ruh u ong ba kin sa pynkynmaw biang ïa kane ka mat ha ka jingwan jong u Myntri kam pohïing ka ri u Amit Shah sha Meghalaya katba une ruh ym pat thikna la un wan ne em mynta namar nga la ïoh jingtip ba u lah ban ym wan hi ruh”.
Kumta u kyntu jur ïa ka sorkar khamtam ïa u Myntri Rangbah, u Symbud Myntri Rangbah bad u Myntri kam pohïing ba kin shim khia ban bud dien thikna ïa kane ka kam ban ïashai kdar shwa ban ïaleit sha ka election 2023.