Ka sorkar ka la dei ban pynshitom ïa kiba donkti siat iap ïa u nongïalam barim ka HNLC ong u nongïalam

Shillong, Nailar 13 : Kum ka jingkynmaw ieit bad rakhe pyndon burom ïa ka Lyngkhuh snem Sngi Iap Ba Ar jong u nongïalam ba rim ka seng HNLC uba long u General Secretary ba rim ka Seng u bah Cherishstarfield Thangkhiew mynta ka Sngi U Blei la pynlong ka jingleit buh syntiew ha u Lum Jingtep ha Lawmali. Ha kane ka jingleit buh syntiew la wan ban synran bad ïadon ryngkat lang ruh da ki nongïalam ka seng HNLC kiba dang don mynta ha ka miej jingkren ïasuk bad ka sorkar pdeng bad sorkar jylla.
Ki bahaïing bahasem jong u Bah Cherishstarfield ki la leit ban buh syntiew mynta ka sngi ban kynmaw burom ïa la u baieid bathoiñ uba la khlad noh ar snem mynshwa na ka jingshah siat iap ha ki pulit ka jylla kata ha ka 13 tarik Nailar 2021.
Lah ban ong, ba kane ka dei ka sien kaba nyngkong ba ki dkhot ka HNLC ki la ïoh lad ban leit buh syntiew ïa la u nongïalam barim namar ba ki don hapoh jong ka jylla ban ïakren ïasuk bad ka sorkar jylla bad sorkar pdeng.
Ha kane ka jingleit buh syntiew, ka seng ka la aiti ïa ka Lama jong ka HNLC ha ka kurim jong u bah Cherishstarfield kum ka dak ban kynmaw burom ïa la u nongïalam u ba la khlad noh ha u snem 2021.
Hashwa kane, ki nongïalam ka HNLC ki la pynpaw ïa ka jingbitar halor ka jingbuh kyndon ka sorkar ba ki dei ban leit buh syntiew ha u Lum jingtep Lawmali ha ka por 8 baje mynstep, hynrei ki nongïalam ka HNLC ki la pynkheiñ ïa katei ka jingbthah bad ki la leit ban buh syntiew haka por 2 baje mynsngi ryngkat bad ki bahaïing bahasem jong u Bah Cheris.
U Ksiang ka HNLC u bah Sadon Blah, haba ïakren bad ki nongthoh khubor ula ong, haduh mynta kam pat don kano kano ka jingsngewsyier ïa ki dkhot ka HNLC kiba dang don ha ka jingïakren ïasuk hapdeng ka sorkar jylla bad sorkar pdeng.
Ula ong, kiba bun balang ki la pynpaw ïa ka jingsngew artatien ban shaniah ïa ka sorkar jylla ban wan ïakren ïasuk hadien ka jingshah siat iap jong u (L) Bah Cherishstarfield.
“Hooid ka long kumta bad kane ka dei ka jingsngew na ki bun balang khamtam hadien ka jingshah siat iap u bah Cherish ha kti ki Pulit. Ka la don ka jingsngew ba dei ban husiar hynrei haba nga shimti ïa kane ka kam ban pynïaid ïa ka jingïakren ïasuk, haduh mynta ngam ïohi ba kan don kano kano ka jingsngew artatien ne ban husiar namar ka jingïakren ïasuk ka ïaid beit ïaid ryntih” la pynkut u Bah Sadon Blah.
Haba kylli pat na u nongïalam ka seng HNLC u la ong “ Kane ka jingshah siat iap u nongïalam ba rim ka seng ha Mawlai ka la jia mynta la ar snem bad ka dang hap hapoh ka jingbishar jong ka ïing bishar High Court jongka jylla. Kumta ngam kwah ban ai kano kano ka jingkynthoh la ngi hun ne ngim hun namar ka dang don hapoh ka jingkhmih jingbishar ka ïing bishar ngin ïai ap ïa ka rai jongka ïing bishar bad dei hadien kata ngin sa lah ban ong la ngi hun ne em”.
“ Kane ka jingshah siat iap ngi tip shai kdar ba ka dei ka jingleh palat bad jingthombor na ka liang ki pulit kiba ïadon kti ha ka jingwan khynra ïa ka ïing sah u bah Cherishstarfield kaba la poi shaduh u pud ba un shah siat iap. Kat kum ka jingsngew jong ngi tang kawei kaba ka sorkar ka dei ban leh ka long ban pynshitom kat kum ki kyndon aiñ ïa ki briew kiba don kti halor kane ka jingjia. U la ong ba kiba haïing jong une u nongïalam ba rim jong ngi ki la leh ïa kaba dei eh ban leit ujor sha ïing bishar namar tang ka ïing bishar kaba lah ban hukum ïaka sorkar ba kan leh ei ei halor kane ka jingshah siat iap u nongïalam ba rim ka seng” pynkut u nongïalam ka seng.