Shillong, Jymmang 8 : Kumba ka Inner Line Permit (ILP) ka long ka stieh ban ïada ïa ka jaidbynriew na ka jingshah tyllep ha kiwei pat ki jaidbynriew, kumta ruh ka sorkar ka la dei ban shim khia ban bud dien biang ïa ka jingdawa ILP na ka sorkar pdeng namar kumba long mynta i kumba ka sorkar pdeng ka leh klet ïa kane ka kam, ong u MLA ka Mawlai Constituency bah P.T Sawkmie.
Haba ïakren bad u nongthoh khubor u la ong “ Lada ka sorkar pdeng ka ai kloi ïa ka ILP wat ka ïa ka rel kit mar ruh lehse la lah ban poi ha Byrnihat namar kumba long mynta hi ki seng bhalang bapher bapher bad wat ki paidbah ruh ki sngew pyrshah ïa ka lynti rel namar bym don aiñ ban ïada na ka jingwan tuid kiwei ki jaidbynriew. Nalor kata wat ki seng bhalang ruh ki la kren shai kdar ba katba ym pat ïoh ïa ka ILP da lei lei ruh kim shah ban wanrah ïa ka lynti rel haduh Byrnihat hynrei lada ïoh ïa ka ILP kin shah noh ïa ka lynti rel ruh” ong u bah Sawkmie.
Balei ba ki seng bhalang ki pyrshah ïa ka lynti rel namar ki sheptieng ïoh shah tyllep ka jaidbynriew ha kiwei pat ki jaidbynriew, namar khlem lynti rel ruh katne ka jingwan tuid kiwei ki jaidbynriew sha ka jylla lada don lei lei sa ka lynti rel ym tip shuh aiu kan jia. Kumta khnang ban don ka stieh ban ïada ïa ka jaidbynriew ka sorkar pdeng ka dei ban ai noh kloi ïa ka ILP ne ka sorkar jylla ka dei ban leit tynruh bad bud dien ïa kane ka kam khnang ba ka sorkar pdeng kan ym leh klet satia.
U bah Sawkmie u la ong, “ Hooid ki don ki issue kiba ktah ïa ka jaidbynriew kiba don hakhmat eh kum ka kam ïa pynbeit pud, ka kam pynbeit ïa ka thungkam thung jam, ka kam khaïi dewiong bad mawshun beaiñ bad wat ka kam ban pynkynriah ïa ki kharmetor na them ïew Mawlong, hynrei kaba kham khia bad kaba ym dei ban klet ne buh shadien ka dei kane ka kam ILP namar nga ïohi kumba ka sorkar pdeng ka pyrshang ban pynklet bad lehklet ïa kane ka kam ba ka jylla ka la leit rah da ka Resolution sha ka sorkar pdeng naduh u 2019 hynrei haduh mynta pat ka sorkar pdeng kam ai kano kano ruh ka jubab hynrei ka shu sngap jar jar.
