Shillong, Rymphang 14: Ki riewngeit jong ka Balang Katholik ha ka Sngi Balang ryngkat lang bad ha ka pyrthei baroh kawei ki la rakhe ïa ka jinglehniam jong ka Sngi Balang Ber Dpei ne ka Ash Wednesday.
Kane ka jinglehniam ka dei ruh kum shibynta na ka jingsdang ka aïom Len.
Ha kane ka sngi ha ki Parish jong ka Jylla Niambah Shillong ki la pynlong ïa kane ka jinglehniam kaba kyrpang kaba dei ka sngi kyndiah bad ka sngi shah jingit.
Ha ka jinglehniam ha St. Joseph’s Church, Mawkhar Parish u Parish Priest Fr Teibor Lyngdoh ha ka jinglehniam u la ong ba ka sngi Balang Ber Dpei ka pynkynmaw ba kum kiba ngeit ngi la rung mynta sha ka aïom Len, kaba mut ka jingim kaba kylla kaba mut bad ban pynthymmai ïa la ka jingim.
Haba ai ïa ka sneng ka kraw u Fr. Teibor u la ong ba u dpei u long ka dak jong ka jingkylla kaba mut. U dpei ka thew ïa ka jingtlot bad sngewrit jong u briew, ban pynrit ïalade hakhmat jong u Blei.
“Ka jingtah da u dpei ha shyllang mat ka pyni ba ngi long kiba rit bad ba ngi donkam ka jingïarap jong u Blei. U dpei u thew ruh ïa ka jingkylla kaba mut. U dpei u pynkynmaw ïa ngi ïa kaei kaei kaba don hapoh dohnud. U dpei u long ka dak ka jingpan mab, ka jingthoh ka ong ba ngi long tang u dpei kaba mut ba ngi long kiba tlot,” ong Fr. Teibor.
Haba pynshai ïa ka jingdonkam jong ka aïom Len, u Fr. Teibor u la ong, “kane ka aïom ka pynkynmaw ba ngi dei ban kylla ka jingim na kaba rim sha kaba thymmai. Ki lai bynta jong ka jingim ba ngi donkam ban pynthymmai kaba mut ka jingïadei ha ka mynsiem da kaba ïai duwai namar u Blei u ieid nyngkong ïa ngi. Dei u Blei uba la thoh ïa ka kyrteng jong ngi ha la ki ksangkti jong u. Ha kane ka por len kan pynkynmaw ïa ka jingieid U Blei, ban pynbeit ïa la ka jong ka jingim bad lada ngi buhrieh ne leh raiñ ban leit phla kan ktah ïa ka jingim jong ngi.”
U la ong ruh ba ka por Len ka dei ka por ban ïarap ïa kiwei ha ka imlang sahlang bad ka mynsiem jong ka jingïa ieid markylliang.
“Ha kane ka por Len ngin pynïadei bad ki briew, ngin phai khmat sha la ka jingim kaba shimet ban kiar na ki jingmlien kiba sniew. Shah jingit na kaei kaei ka bym wanrah jingbha bad pyndonkam bha ïa ka por. Shah jingit na kaba kren ne leh ïa ki kam kiba sniew, shah jingit na kaba peit ïa kino kino kiba sniew kiba wanrah ïa ka pop,” u la bynrap.
Ha kane ka jinglehniam la sakhi ïa ka jingiashim bynta jong ki paidriewngeit kiba la pyndap smam ïa ka Ïingmane bad kumjuh ruh ïa ka phyllaw Ïingmane.
