Shillong, Rymphang, 14: Ki dkhot jong ka HYC Sohïong Zone ba la lamkhmat da u President samla Purningstar Shabong bad u General Secretary u amla Wesmandar Lyngdoh Lyngkhoi ha ka sngi Balang ki la leit jurip kyndit ïa ka CHC Sohïong hadien ba la ïoh ïa ka jingujor bad ka jingud jingnam na ki paidbah na ka por sha ka por halor ka jingbym biang ha ka rukom sumar jong kane ka CHC.
Ka Seng ha kane ka sngi ka la lap ba ym don Doctor ha kane ka CHC bad ki don tang ki katto katne ngut ki nongtrei. Na ka liang ki nongtrei ki la thok ba ka Doctor ka dang bam sha kamra. Hynrei kham hadien ki la pyntip ba ka doctor kam don ha CHC bad ka dang leit donkam.
“Kaba pynlyngngoh ïa ka seng ka long ym don satia wat tang uwei ruh u ban shah sumar ha kane ka CHC bad ka CHC ka kynjah slam slam kum ka ïngjah.
Kham hadien, tang shu wan mih ka doctor ka kren beit da ka jingdom bad la shu ïakren ha phyllaw ka CHC bad kam shym la khot ïakren wat tang ha kamra ruh.
U President ka seng u la pynpaw ïa ka jingbynñiaw halor ka jinglong jingman jong kane ka CHC bad ula ong ba ki paidbah ki la duh ïa ka jingshaniah ha kane ka CHC kumba ka paw ba ym don nongphah sumar ha kane ka CHC.
U la ong ruh ba ki paidbah jong ka thaiñ ki hap ban leit phah sumar sha CHC Mawphlang haba ki mad ïa ka pang ka shitom namarba ka CHC Sohïong kam lah ban ai ka jingshakri kumba ka dei ban ai.
“Dei na ka jinglong jong ki nongtrei kaba kumne lehse, kaba la pynduh jingshaniah noh ïa ki paidbah jong ka thaiñ ïa ka CHC ha kaba ka doctor haba ïakren ka kren da ka jingdom,” la ong u Bah Shabong.
“Kam mut ba baroh ki nongtrei jong ka CHC kim don ka jingkitkhlieh. Hynrei ki don ki Nurse kiba ka seng ka lap kiba trei sha ki Sub-Centre kiba hab hapoh ka jingpeit jong kane ka CHC kiba trei shitom bha. Hynrei kiba trei ha CHC ki la duh noh ka jingshaniah na ki paidbah,” u la bynrap.
Ula ong ruh ba lada ka jingdon jong ka CHC Sohïong kam shym la ai jingmyntoi ïa ki paidbah jong ka thaiñ bad ka jingdon jong kane ka CHC ka long tang ban pynlut kai ïa ka pisa jong u paidbah, kam don jingmut ban don ïa kane ka CHC.
U la kyntu ïa ka Sorkar Jylla ba ka dei ban pynbiang ïa ki doctor, ki nurse bad ki jingdonkam baroh ha ka CHC Sohïong kumba ka leh ha kiwei ki CHC bad lada ka Sorkar kam lah ban pynbiang ïa ki jingdonkam ka seng kan hap ban khang tala noh ïa ka CHC ha kano ma ka sngi.
